MPC President, Pu Lalhmangaiha Sailo-in ZPM thil tum chu Congress emaw MNF emaw paih ringawt ni lovin, mipuite tana hmasawnna tak tak thlen an tum niin kumin atana MPC party Pisa hawnna inkhawm, vawiina neihah a sawi a. Mizoram-in hmangaih leh duat taka enkawl theitu a neih theih nan a taka hnathawk duhten he thawhhona pawl hi an din nia sawiin, an thawh hona chu a hlawhtlin a, mipui tana rawng an bawl theih nan mipuite thlawpna a ngen a ni. Pu Lalhmangaiha Sailo chuan, tuna Mizoram kalphung thlak thei tur chu ZPM chauh a ni rih nia sawiin, ram \ha zawka Mizoram hlang kai turin ZPM hian hruaitu a nei \ha tawk a, Congress leh MNF hruaitute chu mipuiin an en chhin tawhte vek an ni a, mipui tana thil \ha tih tur tam tak inchhawp hlen chhuak turin ZPM hian thuneihna a chan a ngai niin a sawi. MPC President chuan, MNF leh Congress-in kum 30 chhung Mizoram an kaihhruai chhunga ram an kaihhruai dan chu a thuhmun deuh reng nia sawiin, an hming a inang lo tih mai loh chu ram an kaihhruainaah thil thar hnutchhiah an nei lova, tun thlengin mipuite chu an retheih ngaiin an la rethei reng a, state dangte aiin Mizoram a la pachhe bik reng chu a \ha lova, chuvangin kum thar, 2018 hi chu Mizoram tan danglamna thlen tirtu a nih theih nana \an lak hun a ni tawh niin a sawi. Pu Lalhmangaiha Sailo chuan, kum 30 chhung Mizoram lo kaihruai tawhtute chu hna engmah thawk lova puh chu thil dik ni lo mah se, hmasawnna chu a chhunga cheng mipuia nghawng a neih dan a\anga teh \hin a nih avangin tun thlenga sorkar hnathawhin mipui a nghawng danah vantlang tana thil \ha leh hmasawnna danglam hnutchhiah an la nei lo niin a sawi a. Mizoram chu sum leh paia chim ral theih dinhmuna a la din reng laia, NLUP hlawhtlin thu thuneituten an puang chu thil inhmeh lo tak niin a sawi. Tun thlenga hriselna lam hawi hnathawhna enkawl dan te, zirna, kawngpui \ha leh kawlphethaa intodelh tura \an lak a nih dante chu a taka hnathawh tumna awm lo niin Pu Lalhmangaiha Sailo chuan a sawi bawk.
Vawiina MPC Pary Pisa hawnna inkhawm hi an pawl Vice President, Pu Lalthansanga’n a kaihruai a. A hmanpuitu, ZPM Steering Committee Chairman, Pu Lalliansawta chuan, ZPM thawh honain Kohhran hruaitute leh Revival Speaker thlengin thlawpna \ha tak an dawng nia sawiin, lawmawm a tih thu a sawi a. Tun hma a\angin Mizo mipui tam zawk chu Party politics-in a luhchilh hneh hle a, sorkar thlak a nih pawhin mipuiin sorkar ding lai an nin tawh avanga thlak an ni deuh ber \hin a. Tunah erawh chuan Mizo mipui zingah politics ngaihdan thar a piang mek a, hei hi ZPM-in kalphung thar tia vuahin, mi rilrua Party Politics lo intuh tawh chu \hiat a, ram siam \hat duhna thinlung tuh turin theihtawp an chhuah a ngai niin a sawi. ZPM General Secretary, Pu K. Sapdanga pawhin, tunah hian ZPM chu sorkar an siam theih leh theih loh tur thu-ah mipuiin zawhna pakhat an pe a, chu chu an \angrual thei dawn em tih nia sawiin, hei hi \angrual pawl zinga tel Political party Worker-te zawhna pawh a ni a, ZPM hruaitu lawk 4/5 vel chu \ha taka an \angrual thei a nih chuan sorkar siam tura hun \ha an nei niin a sawi. Pu K. Sapdanga chuan, tunah hian mipuiten thlak duh ngawih ngawih an nei a, chu chu sorkar a ni a, tu zawkin nge an thlak ang tih chauh chu zawhna awm chhun a nih thu leh a thlak thei tura ngaih zingah ZPM chu an dinhmun a \ha zawk niin a sawi a. An pawl tana thawktute chu an phak ang tawk tawka \an an laknaah Pathian duhzawng ang zela \an la tur leh Pathian malsawmna dawng tlaka hna thawk turin a chah a ni.
