Mizoram Truck Owners’ Association-in Motor Parts zuar zingah, a man inziahna thai chhia a, MRP aia tova hralh ching an awm nia sawiin, hetiang hi ti tawh lo turin an ngen. Thuchhuah an siamah MTOA chuan, Motor lian hmanga eizawngtute chuan Mizoram tana ei leh bar an phur luh kawngah harsatna hrang hrang an tawh thin thu leh, chung zingah chuan Mizoram chhung ngeia Motor Parts zuartute zingah mi thenkhat a man inziahna thaichia a, MRP aia tova hralh ching awn awm chu tha lo an tih thu an sawi a, hetianga mahni hnampui ngei pawh bum duh an awm chu a kristian lova, a Mizo lo hle tih sawiin, MTOA chuan hetiang tih chingte chu ti tawh lo turin an ngen a, tilui an awm a nih chuan man chhuak tura tanlak an inhuam thu an sawi a ni. ————
KtP General Conference vawi 57-na, kumin March ni 1 atanga ni 4 thlenga West Phailenga neihna tur Pandal chu ngawrh taka sak mek a ni a, kar hmasa khan Pandal chung hi chih zawh a ni. Thawhtanni atanga nimin thleng khan a bang pin leh hna pawimawh dangte thawhzui a ni a, nimin khan West Phaileng bakah Mamit Hmunsam bial KtP thalaite an hnatlang a ni. Pandal sak hna hi West Phaileng bakah a chhehvel khua Kohhran hrang hrang memberten an thawk a, hnatlang tawh zingah chuan Rawpuichhip, Damparengpui, Lallen, Chhippui leh khaw dangte bakah IKK Mamit Kohhran thalaite an tel a ni. West Phaileng Kohhran hruaitute hnen atanga thu dawn danin Pandal hi mi 12,000 leng thei turin, a dung ft 275, a vang ft 170 a liana sak a ni a, mi tam zawk an len theih nan a sirah zauh a nih bakah a hma lamah Synod Pandal structure hmangin ft 50 a zauh mek a ni. Puan tawh angin KtP General Conference neihna tur Pandal sak nan hian Synod Pandal ruhrel la hman theih leh, Central YMA Pandal sakna hmanruate hman a ni.
