MNF Vigilance & Legal Dept. Secretary, Pu David R. Lalsawmtluanga chuan Mizoram Sorkar chu GPF, DA leh DR hmanga a hnathawkte rawkah a puh. He thu hi vawiina Aizawl Press Club-a thuthar lakhawmtute a kawmnaah sawiin, sorkar hnathawkten an mamawh huna an lakchhuah tura thla tin an hlawh atanga pawisa an dah that, General Provident Fund (GPF) chu Head of Office emaw Drawing and Disbursing Officer emaw phalnaa lakchhuah theih tur a nih laiin, Congress Sorkar chuan Chief Minister, Finance Minister, Parliamentary Secretary leh Finance Secretary chu bithliah awm lovin, Finance Department-a Superintendent chung lam zawng hnenah Quarter khat atan cheng nuai 80 theuh Reserve Fund an inpe niin a sawi a, hei hi Sorkar kalphung phuahchawp mai niin a sawi bawk. Pu David R. Lalsawmtluanga chuan Sorkar hnathawkte GPF chu a pawisa neitu, Sorkar hnathawkten an lakchhuah theih loh avangin Minister laina hnaite, Bhawan lam mi leh sate leh Quata nei Officer thenkhat hnen atangin an lakchhuah duh zat atanga za-a 5 atanga 10-in an lei a ngai hial nia sawi awmte chu a dik leh dik loh chhuichhuaka, a dik a nih chuan a mawhphurtute hrem tur leh an sum lak tawhte pe kir leh turin sorkar an phut thu a sawi bawk. Sorkar hnathawk mek leh Pension tawhte Dearness Allowance (DA) leh Dearness Relief to Pensioner (DR) pawh a hun taka pek a nih loh avangin Sorkar hnathawk leh Pension tawhten an tuar nasa hle niin a sawi a, Pu David R. Lalsawmtluanga chuan, kum 2010 July ni 1 atanga nikum January ni 1 thleng khan Sorlar laipuiin sum a pek vek hnua Mizoram Sorkar-in a pek ve theih loh tlingkhawm chu sorkar hnathawk tan thla 104 leh Pensioner tan thla 121 a tling hial a, Group A,B leh C te chu an DA pung atanga za-a 72 chu GPF-ah tihpuihnaa dah tir niin, Group D pawh zaa 36 dah tir an niin a sawi. Heng thil hrang hrang hi Sorkar-in sum a enkawl thiam loh vang bak chhuanlam dang a awm lo nia sawiin, Congress kaihhruai Mizoram Sorkar chu sum leh pai enkawl zel tlakah MNF chuan a ngai lo niin a sawi bawk.
