MNF Vigilance Committee hotute hian vawiin khan Aizawl Press Club-ah thuthar thehdarhtute kawmin an pawl Secretary Pu David R Lalsawmtluanga chuan, Sorkar laipuiin Mizoram tihhmasawnna turin Product Infrastructure Development Destination Circuit Scheme hnuaiah sum tam tham tak a rawn pe tih a sawi a, second installment pek hmabak a nih laiin Central-a sorkar tharin scheme hi a tih tawp tak avangin he sum hmanga hnathawh laklawh lai pawh chhunzawm theih lohin a awm ta a ni a ti. Khawzawl Tourist Lodge sakna tur atan bik hian a tirah cheng nuai 337 sing 4 sang 7 ruahman a ni a, contractor Royal Engineering and Architectural Consultant hnenah cheng nuai 324 sing 6 sang 6 senga thla 18 chhunga sa zo turin work order kum 2014 February ni 13 khan pek an ni a, khawzawl tourist lodge sak zawmna tur leh project dang paruk chhunzawmna turin NEDP sum cheng nuai 304 chu october 2018 ah pek chhuah ni mahse, Khawzawl Tourist Lodge sakna tur sum awmna chin chu hriat a ni ta lo niin a sawi.
Pu David R Lalsawmtluanga chuan PIDDC Scheme a tawp avanga hna chhunzawm theih tawh loh te chu State dang chuan an mahni sum hmangin an chhunzawm tih a sawi a, he sum awmna chin chhuichhuah sak tur hian khawzawl Darngawn venga Pu PC Chuauhnuna’n nimin khan Lokayukta Chairperson hnenah Complaint a thehlut tih a sawi.
Pu David R Lalsawmtluanga chuan, Congress sorkarin sum tam tak an pek chhuah lai hian an pekna ang chiah chiaha hman turin an pek ang zat chiah tho hi Department-in NEC-ah an dil bawk niin a sawi a, thil dik lo leh sum bo te chhui chhuaka hrem ngai te hrem turin sorkar thuneitute an ngen tih a sawi.
