He thu hi nimina Aizawl South III Block MNF vantlang inkhawmah sawiin Pu Tawnluia chuan mi retheite innghah ngamna, langtlang sorkar din chu an tum nia sawiin, hlemhletna umbo a nih theih nan thuneihna semzai, ‘decentralisation of power’ an kalpui dawn niin a sawi. Pu Tawnluia chuan ram leh hnam sakhua himna chu an party ngaihpawimawh zinga mi a ni a, a tichhe thei zawnga thilti te chu an dodal zel dawn niin a sawi. Pu Tawnluia chuan party dang angin an President Pu Zoramthanga’n a thachhangdawltu a ban zur zut ve lo niin a sawi a, an party dintu Pu Laldenga hovin hunrei tak an kal hnuah Pu Zoramthanga hovin tun thlengin an hruaitute chu lungrual takin an la kal nia sawiin hei hian an President chu a rintlak zia a tichiang hle niin a sawi. He inkhawmah hian Pu Tawnluia’n an party zawm thar mi engemawzat a lawmlut nghal a ni. Inkhawm hi Hlimen MNF Unit President, Pu Joshua Zotea an a kaihruai a, he bial viltu tura ruat Dr. F. Lalnunmawia pawhin thu a sawi bawk.
