MNF President, Pu Zoramthanga chuan Chakma Autonomous District Council inthlannaa member thlantlin ngah ber MNF chu democracy kalphung angin sorkar siam turin Larsapin a sawm tur a ni a ti. Hemi chungchanga ZONET zawhna chhangin Pu Zoramthanga chuan CADC-a MNF Legislature Party, Pu Rasik Mohan Chakma kaihhruaiin sorkar a siam theih nan Inrinni khan Raj Bhavan-ah ngenna an thehlut tawh tih a sawi a, amaherawhchu, Chakma Autonomous District Council dan angin sorkar an siam thei tih Larsap hriattirna an thehluh hi District Council & Minority Affairs Secretary kaltlanga thehluh tur a nih avangin Inrinnia an thehluh tawh chu Larsap hriattir lailawkna angah an party chuan an ngai a, nimin, Pathianni leh vawiin, Thawh\anni, sorkar pisa chawlhni a nih avangin dan anga thil tih tur te hi bawhzui mai theih a nih loh avangin District Council & Minority Affairs Secretary hnena lehkha an thehluh tur chu naktuka sorkar pisa hawn a nih leh hunah rang taka bawhzuia chinfel a ni dawn niin a sawi a ni. Zawhna dang chhangin Pu Zoramthanga chuan CADC MNF Legislature Party, Pu Rasik Mohan Chakma kaihhruai hi MNF member 8 an ni a, anmahni thlawptu tur member dang pathum te hming erawh chu ziah lan a rem rih loh avangin Raj Bhavan-a an lehkha thehluhah chuan an ziak lang lo niin a sawi a, amaherawhchu, Pu Rasik Mohan Chakma kaihhruai MNF sorkar an siam hunah chuan sorkarin thlawptu a ngah tawk leh tawk loh fiah tura Larsapin a tih hunah thlawptu an ngah tawk tih an tilang thei ngei dawn niin a sawi a, amaherawhchu an ruahmanna siam kimchang erawh chu sawilan a rem lo niin a sawi a ni. Hetihlai hian MNF Member te hi hmun khatah ngaihdan thuhmun neiin an awmkhawm zui zel nia an party hruaitute hnen a\anga thudawn a ni a, hetihlai hian Larsap hnena sorkar siam thei an nih thu kar kalta Ningania thlentu BJP member 5 leh Congress member 6, an vaiin member 11 te chuan Chhotapansury bial a\anga BJP ticket-a thlantlin, Pu Santi Jiban Chakma chu an United Legislature Party hruaitu atan thlangin a kaihhruai sorkar CADC-ah an siam thei niin an sawi a, Raj Bhavan-a lehkha an thehluhah hian anmahni thlawptu Congress member 6 hming leh an party member 5 te hming an ziak vek niin an sawi a ni. Puan tawh angin BJP leh Congress Party ten United Legislature Party an siamah hian Deputy Leader atan Vaseitlang bial a\anga Congress ticket-a thlantlin, Pu Buddha Lila Chakma chu ruat a ni a, Mandirasora bial a\anga Congress ticket-a thlantlin, Pu Onish Moy Chakma chu an Legislature Party Secretary atan thlan a ni bawk. An Party hruaitute sawi danin a tira BJP leh Congress ten Joint Legislature Party an din hming chu remchan zawkna avangin United Legislature Party tia thlak a ni a, United Legislature Party-ah hian Party mal hming bik sawi lovin MDC atana thlantlin eng party ami pawh an tel thei dawn niin an sawi a ni.
