Mi tam takin an nghahhlelh corona virus test-na khawl lei turin Mizoram sorkar chu a inpeih tawh nachungin, khawl lei hi bazara anhnah tel lei anga lei mai theih anga thil awlsam a ni lo tih MNF Party hian thuchhuah siamin an sawi a, Hmarchhak bial pumpui intawm tlan theih turin sorkar laipui meuh pawhin tunhnai maiah chauh khan Guwahati-ah khawl pakhat a dah thei chauh a ni an ti a. Medical College leh University lo ding hlun tawh tak takte pawhin an la nei lo vek zawk nia sawiin hetih mek lai hian Mizoram sorkar chuan neih ngei tumin hma a la a, chuti maia lo thleng mai thei tur a ni lo a, hun a duh deuh dawn tih hre turin mipuite an chah a ni.
Covid 19 laka Mizoram a him theihna tura Chief Minister Pu Zoramthanga leh Health Minister Dr. R. Lalthangliana hmalakna chu fakawm an tih thu MNF party hian an sawi a, Covid 19 khawvelin a buaipui atangin Mizoram a rawn thlen loh na turin Health Minister Dr. Lalthangliana’n a tir a\angin hma a la nghal a ni an ti a, ram dang mi leh state pawn atanga khual zin luhkapui ber Lengpui \umhmunah te, ram dang leh state dang nen inrina laiah te duty dah an nih bakah heng hmuna zin veivak te hriselna dinhmun enfiah sak turin damdawi lam thiamte duty tir an ni an ti a. Chief Minister kaihhruiin Minister, sorkar deptt hrang hrang leh NGO te pawh an \hutkhawm tawh thu te sawiin, Health Minister hmalakna ti chak tura Chief Minister inphalna pawh a fakawm a, Mizo mipui tan a thlamuanawm hle a ni an ti. MNF chuan hri leng laka himna tura sorkarin hun engemaw ti chhung zirna in hrang hrang khar-a mipui punkhawm a khap te chu chu hrethiam turin mipuite an ngen a, he hri leng laka himna turin mipuite chu sorkar hmalakna thlawp tur leh sumdawngte pawh an thil zawrh man tito lo tur leh bungrua chheprelh lo tur te in an ngen a ni.
