MNF MLA rualte thukhawm hian ram leh khawtlang himna tura theihtawp chhuahtu VLTF leh LLTF te, Police leh mi tlawmngai hrang hrang te inpekna-ah lawmthu an sawi a, an inpekna avangin khawtlang a him zel ang tih an rin thu an sawi a, Covid-19 hri dona kawngah Mizo tlawmngaihna zonunmawi a par vul zel te, mipuite tanrualna leh inpumkhatna lo lang zelte chu ropui an tih thu an sawi a, khawvel hriata zonunmawi phochhuak zel tura tan la zel turin Zoram mipuite an ngen tih an sawi a. Kohhran leh mi thahnemngai, tawngtaisak thintute chungah lawmthu an sawi bawk.
MNF Legislature Party hian Covid-19 natna vei enkawl mek 129 te an damthat leh thuai theihna turin duhsakna an hlan tih an sawi a, enkawl dam mi 8 in naktuka damdawiin an chhuahsan thei tur chu lawmawm an tih thu an sawi a, an dam theih nana theihtawp chhuahtu Doctor, nurse leh thawktu dangte inpekna leh thahnemngaihna lawmawm an tih thu an sawi.
Naktuka Rajya Sabha member thlanna neih tur pawh MNF Legislature Party hian an thlir ho a, MNF candidate Pu K.Vanlalvena chu a tlin ngei theihna turin duhsakna an hlan tih an sawi.
