Vawiina Aizawl Press Club-a thuthar lakhawmtute a kawmnaah Pu Lalruatkima chuan, MNF kaihhruai sorkar chuan Zo hnahthlakte insuihkhawmna leh inpumkhatna atan chak zawka hmalak chu an thil tum a nih thu a sawi a, Mizo nationalism, ram, hnam leh sakhua te a him theihna turin an party chuan ke a pen zel tih a sawi a, Zohnahthlak ram hrang hranga \hendarh a awm ten thuneihna sang zawk nei a, rorelna pakhat hnuaia an awm theihna turin, “UNO Declaration on the Rights of Indigenous Peoples 2007” a hlawhtlin ngei theihna turin hma an lakthu sawiin hemi chungchanga Pu Vanlalhlana MLA Pvt Member Resolution pawh Assembly-ah lungrual taka pass a ni, a ti.
Rei lote chhunga Sorkar hmalakna tarlangin Pu Lalruatkima chuan, MNF Sorkar chu ni 100 chauha upa ni mahse hna tam tak an thawk hman tawh tih a sawi a, ram leh hnam himna ngaihpawimawh a nih thu te, inchimralna laka Mizote an him theihna turin Bengal Eastern Frontier Regulation 1873 chu khauh zawka lekkawh a, dan lova ramdang a\anga Mizorama rawn lutte dan hmanga dapchhuak a, thawnkir an nih theih nan khua leh tui dik tak chhianchhiahna tur, The Mizoram Maintenance of Households Register Bill, 2019 pass a ni a, Citizenship Amendment Bill 2016 pawh nasa taka dodaltu an nih thu leh an party President, Chief Minister Pu Zoramthanga pawh CAB 2016 a dodal nasat avanga hmarchhak zirlai pawl inzawmkhawmna NESO pawhin lawmthu an hirlh hial a nih thu a sawi. CAB chu MP election au hla bera hman a ni zui zel tih sawiin Pu Lalruatkima chuan, heti taka CAB a hlauhawmna chhan chu Sorkar hmasa Congress-in ramri a ven \hat loh vang leh inthlahdah vang a ni, a ti a. Lirthei neituten harsatna an tawh Vehicle replacement kalpui dan ennawn mek a nih thu leh chhiah lak dan pawh tidanglamin chhiah petute duh thlan theih tura ruahman a nih thu a sawi a, MR hlawh tih pun a nih thu te, sorkar hmasa hnuaia hlawh la thei lo SSA a thawkte hlawh pawh pek a ni a, Mizoram ei leh bara a intodelhna tur leh kuthnathawktute chawikanna turin pary mal induhsakna awm lo mipui huap zo SEDP hmangin Jubilee dar an vaw dawn tih a sawi a. An sorkar hnu rei loteah Aizawl khawpui a\anga Assam Rifles sawnchhuahna tur Order chu Home Ministry in a rawn tichhuak nghal a, an ram chhuahsan tur chu Sorkarin mimal kuta a luh lohna turin thuneihna an chan hmasak khan dan feltakin an lo pass tawh tih sawiin, Sorkar leh vantlang tana tangkai taka hman a ni dawn tih a sawi. Ramrikawna FCI kudam sawnna tur pawh thuneina an chan hmasak khan Sairang Dinthar-ah ram pek vek a ni tawh chungin sorkar hmasain a sawn thei lo tih sawiin, Pu Lalruatkima chuan, tunah hian FCI kudam chu sawnchhuah turin hmalak mek a ni, a ti a. Zu zawrh tihtawp a nih theihna tura Kohhrante \awng\aina chu chhanin a awm mek tih sawiin, zu khatna dan The Mizoram Liquor (Prohibition) Bill, 2019 chu tunhnai khan a pass ta bawk tih a sawi.
