Vawiina Aizawl Press Club-a thuthar lakhawmtute an kawmnaah Pu Lalremtluanga chuan, Mizoram sorkar-in mipui bum nan The Mizoram Lokayukta Act 2014 tih hming vuahin Lokayukta a
din niin a sawi a, Law Department hnuaiah kum thum, 2016-19 chhungin Budget-ah Rs. nuai 159.34 \heuh avaiin cheng nuai 478.02 dah a ni tih sawiin, Lokayukta-a thawktu tur Peon pakhat pawh lak a nih hmaa cheng nuai tam tak Budget a dah chu a hman dan sawifiah turin Law & Judicial Minister Pu Lalsawta an phut a ni.
MNF Legal Board hotute chuan, Congress sorkar chu Lokayukta din ngam lovah puhin, sorkar laipuiin dan a siam ang chuan Lokpal emaw Lokayukta emawa chairman-te hlawh chu High Court Judge hlawh aiin a hniam tur a ni lo tih a nih laiin Mizoram Lokayukta Act 2014-in chairman hlawh atana a duan chu cheng sing 9 a ni tih sawiin, Congress sorkar chu mikhual chamrei sorkar a nih avanga thil tak tak tih tum lovah an puh a. MNF-in thuneihna an chang a nih chuan an sorkar ve leh eiruk dona tur Lokayukta hi din nghal a ni ang a, a taka hnathawk thei turin an siam nghal dawn niin an sawi. MNF Legal Board chuan, ram neituten chhiah sang tak tak an chawi \hin chu mipui phurrit a ni tih MNF chuan a hria tih sawiin, an sorkar hunah chuan a zangkhai thei ang bera chhiah pek a nih theih nan ruahmanna an siam dawn niin an sawi bawk.
