MNF General Secretary Pu Lalruatkima MLA chuan Mizo thalaite hmakhua atana din Mizoram Youth Commission chu sorkarin nasa takin a tichingpen niin a sawi. He thu hi vawiin a South Tuipui Block I MNF Political Training Hnahthial Bazar Building a neih a hmanpuinaah sawiin Pu Lalruatkima chuan MYC chu sorkarin Chairman leh Minister ban ngai hial khawpin a tichingpen a niin a sawi a, sorkar chuan kum 10 chhungin Sports policy pawh a siam hman lo ni a sawiin, hei hian sorkarin thalai te hmakhua a ngaih loh zia a tilang chiang hle a niin a sawi. Pu Lalruatkima chuan, Congress sorkarah ram leh hnam himna nasa takin a derthawng niin a sawi a, ramdang mi pem lut an awm leh awm loh pawh an hriat loh thu te, Chakma-te Census atanga a lan danin awihawm loh khawpa nasa taka an pung chungin Sorkar chu a la ngawi mai mai thei niin a sawi. Pu Lalruatkima chuan sorkarin inkalpawhna kawng a siam te chu inthlan chhung daih atan chauha siam nia ngaih theih niin a sawi a, inthlan hun a thlen hmaa chhe leh tawh te pawh a awm niin a sawi bawk. Pu Lalruatkima chuan Congress sorkar thiltih dan enin MNF in thuneihna a chan a tulzia a tilang niin a sawi bawk. He inkhawm hi South Tuipui Block I MNF President Pu K Lalsangzuala’n a kaihruai a ni.
