MNF party hian, kum tir lamah dan panngaiin Parliament leh State tin Assembly in Budget an pass theuh a, a zat pawh chiang taka hriat vek a ni mahse, Covid-19 hri lengin khawvel a tihbuai tak avangin sumdawnna pawimawh zawng zawng a tawp a, khawvel sum din hmun leh nunphung pangngai pawh a vai din vek a ni an ti a, hemi avang hian Economic leh Financial dinhmun pawh sorkar lian ber atanga te ber thlengin an chiang tawh lova, rinthua kal a ngaih phah a ni an ti a, eng sorkar mahin an sum leh pai dinhmun chiah an sawi thei lo niin an sawi.
MNF party hian, Finance changtu Chief Minister Pu Zoramthanga’n khawvel dang te rualin Mizoram sum leh pai dinhmun pawh a tla chhe ve a ni tih chin chiang takin a sawi a ni an ti a, tlakchhiatna zat number dik tak chu ani leh midangte pawhin sawi theih rual a ni lo a ni an ti.
MNF Party hian Covid 19 do let nan sorkar laipui leh state dangte tih angin CM Relief Fund ah pawl, kohhran leh mimalin an thawh khawm a, a hman tawh dan te pawh puan zar reng a ni an ti a, rorellai Minister leh MLA bakah eptu lam ZPM leh BJP MLA te pawhin phal takin an hlawh atanga an thawh laiin kum 10 lo sorkar tawh Congress MLA te chuan sum thawh an ui ta tlat niin an sawi a, Mizoram mipui an hmangaih loh zia a ti chiang a ni an ti a. An sum thawh uiin zah thup nan Chief Minister chu Finance Minister a nihna midang hlan turin an phut ta a ni an ti.
MNF chuan Congress party chu thu neihna an chan laia sum leh pai an enkawl thiam loh vanga kohhran leh khawtlang duh loh zu zuar-ah an puh a, sum tam tak a lo thlawna an lo luanral tir tawh thinah puhin Congress party chu in enlet turin an duh tih a nsawi.
