Tukin zing dar 7:00 khan MNF Founder Presidet Pu Laldenga thihcham vawi 28-na pualin a thlan Treasury Square-ah, MNF Party chuan a puala inkhawm tawi leh zahna pangpar dahna hun an hmang.
Pu Laldenga thih cham vawi 28-na puala inkhawm buatsaih hi MNF Party Sr. Vice President Pu Tawnluia’n a kaihruai a. Salvation Army Aizawl Temple Bial Commanding Officer Major Lalsawmliana’n hunserh a hmang a. Hemi hnu hian Pu Laldenga sun nan minute 1 ngawi renga dingin a thlanah MNF President Pu Zoramthanga leh Pu Laldenga nupui Pi Lalbiakdiki te bakah MNF party hruaitu dang ten zahna pangpar an dah a ni.
MNF President Pu Zoramthanga chuan, Pu Laldenga chuan Mizo hnam, sakhua leh ram humhalh tlat duhna leh hmangaihna thinlung Zofate-ah a tuh a ni a ti a, Pu Laldenga chu ramchhung leh pawna Mizo hnam pho langtu a ni a, \hangthar te thiamna leh finna sang chho zelah Pu Laldenga hlutna an hre chiang tulh tulh a, Mizoram a awm chhung chuan a hming a dai tawh dawn lo a ni a ti.
Pu Laldenga nupui Pi Lalbiakdiki pawhin thusawiin, tun thleng pawha a pasalin chawimawi a la hlawh chu a fel vang ni lovin Zoram tana a hnathawhte hriatreng a nih vang a ni tih a sawi a, Mizoram State-a hlankai a ni leh hmasawnna hrang hrang hmuh tur awm chu Zoram tana Martar-te thawhrah a ni a ti.
Pu Laldenga hi July 11, 1927-ah Lunglei Pukpui khuaah a piang a, kum 1944-ah British Indian Army a zawm a, kum 1959-ah Mizo National Famine Front dinin, chu pawl chu October 22, 1961-ah Mizo National Front (MNF) tiin thlak a ni. Kum 1986 khan Mizoram sorkar lailawk (interim)-ah Chief Minister niin, kum 1987-a Mizoram state Assembly inthlan hmasa berah Sateek leh Aizawl North-II bial a\anga thlan tlin a ni a, state nih hnua Chief Minister hmasa ber a ni. Kum 1990-ah Memorial Sloan Ketering Cancer Centre, USA-ah thla thum enkawl a nih hnuin Mizoram pana an haw kawngah, Ashford Hospital, London-ah July 7, 1990-ah a thi a, July 13-ah vuiliam a ni.
