Mizoram sorkar-in Mizoram Liquor (Prohibition & Control) Act, 2014 zirchiang tura a din, Study Group-in vawiin khan Home Minister, Pu R. Lalzirliana hnenah an zirchianna Report an thehlut a. Hemi puala inkhawm tawi New Secretariat Complex-a Home Minister Pisa-a neihah Study Group aiawhin Convener, Pu Dominic Lalhmangaiha’n a hlan a ni.
Mizoram sorkar chuan MLPC Act zir chiang turin kum 2016 July thla khan Review and Evaluation Committee a din a, Committee-ah hian Excise & Narcotics Minister, Pu R. Lalzirliana chu Chairman niin, Excise Commissioner chu Secretary a ni a, Sorkar atangin Excise Secretary, Deputy Commissioner, Assistant Commissioner leh Enforcement changtu Superintendent, Aizawl SP, Law & Judicial Deputy Secretary leh Under Secretary-te an tel a. An ni bakah hian Prof. Lianzela, Dr. Lalchhuanawma Tochhawng, Dr. K. Lalbiakzuala, Dr. C. Lalhrekima, Dr. Laldinliana Varte, Rev. R. Lalengkima, JH. Ramnghinglova, Dominic Lalhmangaiha, KL. Liana, RK. Thanga, Lalbiakzuala, Vanlalrema Vantawl, Prof. C. Lalkima, Rev. Dr. K. Lalrinthanga, Rev. R. Lalrinsanga, Lalnunkunga Sailo leh Lt. Col. Lalramhluna an tel a. Review and Evaluation Committee hian MLPC Act chu a hmanna ala rei lo avangin zirchian chu la hma deuhin an hre chungin a zirchiangtu tur Study Group a din ve leh a. He Study Group-ah hian Convener chu Pu Dominic Lalhmangaiha niin, member-te chu Dr. C. Lalhrekima, Dr. Laldinliana Varte, Dr. Lalbiakzuala, Lt. Col. Lalramhluna, Lalbiakzuala leh Vanlalrema Vantawl an ni a. Anni hian tih tur hrang hrang intukin, MLPC Act-in nghawng a neih dan leh a thatna leh that lohnate an zir chiang a. An Convener, Pu Dominic Lalhmangaiha chuan, Sorkar-in ti tura a beisei angin MLPC Act-in mimal leh khawtlanga nghawng a neih dan thlenga an zirchian thu a sawi. MLPC Act hi kum 2015 January ni 15-ah hman tan a ni a, he dan hmang hian kum 2015 March ni 16-ah zu zawrh tan a ni.
