Legislative Assembly Speaker hi party tan bik nei lo a MLA-te hokhawmtu tur, Assembly rorelna kaihruaitu tur, thlei bik nei lo va MLA-te rorelna kaihruaitu tur leh MLA-te ngaihdan lakhawm a, a tam zawk ngaihdan anga rorelna kaltlangpuitu tur a ni an ti a. Hetihlai hian Mizoram Assembly Speaker Pu Lalrinliana Sailo chuan Speaker nihna zahawm tak a chelh hnuah party colour a tihlan nasat lutuk avangin tum engemawzat a zahawmna a humhim zo tawh lo niin an sawi.
Assembly Speaker Pu Lalrinliana Sailo chuan Assembly Session-ah Opposition Party-te nuihza siam nan vawi tamtak a hmang tawh niin Congress party hian an sawi a, mei nei tak takin Speaker ber chu vawi tam tak a lo tawng tawh a ni an ti a. Speaker Chairman-na hnuai ngeia Motor lei tur chungchang ngaihtuahna-a Pu Lalduhoma thusawi pawh nasa takin pawn lama politics-a inbeih nan hman a lo ni tawh a, MLA hlawh tih san chungchang ngaihtuahna-a MLA te thusawi pawh pawn lama inbeih nan nasa taka hman a lo ni tawh bawk tih an sawi.
Speaker Chairman-na hnuaia Committee te chu Committee mawngpawp tia hriat alo ni ta hial niin Congress Party hian an sawi a, tunhnaia Speaker ho ngeia MLA rualte thutkhawmnaah MLA te thusawi chu an thusawi lai nen a ngial a nganin TV-ah tih lan a ni an ti a. Hei hi Assembly Committee kalphung pawh a nih loh avangin Speaker berin thil phiarruk nei sa ranin meeting a ko a, a kaihruai thin a ni tih a lantir a ni an ti.
Congress party hian Media mite hmaa MLA thenkhatte tihmualpho tumah Speaker Pu Lalrinliana Sailo hi an puh bawk a, Mizoram mipui hriat theih tura zahlo taka opposition party-te chungchang sawiah an puh a. A Chairman-na hnuaia meeting neih a MLA-ten an ngaihdan an sawite thlengin media hmaah amah berin a sawichhuak a ni an ti a; hetiang hi eng level committee-ah mah Chairman-ten an tih ngai loh a ni an ti.
Congress party hian Pu Lalrinliana Sailo thil tih dan chuan Assembly Speaker tlak a ni lo tih leh, Speaker Chair zahawm tak timualphotu a nihzia a tarlang a ni an ti a, a rang thei ang bera Speaker a nihna bansan turin an ngen tih an sawi.
