Heng mite Kolasib District quarantine facility-a an awm lai, June ni 1 zana Covid-19 an kai tih hmuhchhuah mi 11 zinga mi kha an ni a, an sample vawi hnih test a nih hnuah an negative vek a. Naktuk-ah ZMC an chhuahsan theih beisei a ni tih health minsiter Dr. R. Lalthangliana’n vawiin khan a puang a. ZMC Bulletin ah pawh mi pariatte hi enkawl dam an ni tawh tih leh naktuka chhuak thei tura buatsaih an ni tih tarlan a ni.
June ni 1 atanga Mizoram-a covid-19 kai hmuh tawh, mi 129 te zingah, tuna mi 8 te hi enkawl dam hmasak ber an ni.
ZMC Director Dr T Lalhmangaihi’n Zonet zawhna a chhan danin, hri kai enkawlte laboratory-a endik nawn leh turin an kai tih hmuhchhuah atanga ni 14 tal nghah a ngai a, hri leng kai hmuh chhuah tawhte zingah ni 14 enkawl tawh an awm nual avangin enkawl dam hi pung chho zel tura beisei a ni.
Nimin khan ZMC-a sample endik 615 zingah hrileng kai hmuh chhuah thar mipa pathum leh hmeichhia 6 an vaiin mi 9 an awm belh leh a, Delhi leh Haryana atanga lo haw 4 ve ve leh Maharashtra atanga lo haw mi 1 an ni a, quarantine facility a awm lai vek, dam lohna la nei lo an ni.
Nimina hmuh chhuah tharte hi Siaha leh Lawngtlai District mi pali ve ve leh Lunglei District mi pakhat an ni a, naupang kum 1 leh kum 10 mi an tel a, midang zawng chu kum 19 atanga 32 inkar an ni. Naktuka damdawiin chhuahsan tawh tura beisei mi 8 te chhiar telin, Mizoramah COVID-19 enkawl lai mi 129 an awm mek a, a hma lama lo enkawl dam tawh mi pakhat nen hri kai hmuh chhuah tawh zat chu mi 130 an ni.
