Ram chhung hmundang rualin National Science Day chu Mizoramah pawh vawiin khan Mizoram Science, Technology & Innovation Council bul tumin Assembly Annexe Conference Hall-ah hman a ni a, thupuiah “Science & Technology for a Sustainable future” tih hman a ni a, Planning Board Vice Chairman Pu H Liansailova’n a hmanpui a ni. National Science Day hi India Scientist Dr CV Raman-a’n kum 1928 February ni 28 a Raman Effect’ a hmuh chhuah hriat reng nan kum 1987 February ni 28 khan rampumah hman a ni a, Mizoramah chuan kum 2006 khan hman tan a ni. He ni pual hian exhibition, talk show, seminar, lectures, van sang lampang zirchianna, debate, quiz competition, exposure tour-te neih a lo ni tawh a ni.
Vawiin a he ni hmannaah hian Scientific Demonstration entir a nih bakah thupui atana hman Science & Technology for a Sustainable future tih hmangin thusawi ngaihthlak a ni bawk.
Serchhip-ah pawh Mizoram Science, Technology and Innovation Council leh Govt. Serchhip College ruahman angin vawiin khan National Science Day, 2018 Government Serchhip College-ah neih a ni. He ni hmanna inkhawmah hian Assistant Professor 2, Dr. Jonathan Lalnunsiama leh Dr. C. Vanlalnghaka ten mihringte hmasawnna leh dinhmun ngelnghehna tura science pawimawh zia zirlaite an hrilh a ni. Inkhawm kaihruaitu Coordinator, Pu Laldingluaia Khiangte chuan National Science Day hi kum 1999 atang khan thupui neia hman thin a ni tih sawiin, kumin hian thupui atan “Science and Technology for Sustainable future” tih thlan a ni tih a sawi a, National Science Day hi India Physicist thiam leh lar tak, Chandrashekhara Venkata Raman, CV Raman tia hriat larin kum 1928 February ni 28 “Raman Effect” tih a hmuhchhuah hriatrengna atan kum 1987 atang khan hman tan a ni.
