Nizan khan ZMC laboratory-ah swab sample 340 endik a ni a, mi 5 in an kai tih hmuh chhuah a ni. An zinga 4 hi COVID-19 vei ni a rinhlelh ZMC-a admit tawh sa an ni a, pakhat hi Lunglei quarantine Centre a awm lai a ni.
COVID-19 vei hmuhchhuah tharte hi mipa 3 leh hmeichhia 2, kum 22 leh 29 inkar vek an ni a, an zinga 4 chu an khua a sik bakah an khuh a, pakhat erawh chu Covid-19 natna lan chhuah dan ang natna la nei lo a ni thung. An zinga 4 hi Delhi atanga tunhnaia lo haw an nih laiin pakhat chu Gujarat atanga lo haw a ni a, May ni 28 leh June ni 1 inkara Mizorama lo hawte an ni.
Lunglei a COVID-19 hmuhchhuah hi Eklavya Residential School Quarantine Facility a awm lai, natna lan chhuah dan ang dam lohna la nei lo a ni a, tukin khan Covid Care Centre, Pukpuiah dah luh nghal a ni.
March ni 24 zanah Mizoramin Covid-19 kai a neih hmasak ber hmuh chhuah a ni a, damlo hmasa ber Rev VL Hruaia Khiangte hi ni 47 zet ZMC-a enkawl a nih hnuah May ni 9 khan dam takin a chhuak tawh a ni.
Hemi hnu hian hun engemawchen Mizoram chuan Covid-19 kai a neih belh loh a, June ni 1, Thawhtanni zan khan Delhi atanga lo haw, quarantine-a awm lai mi 10 leh Kolkata atanga lo haw mi 2, an vaiin mi 12 in Covid-19 an kai tih hmuh chhuah a ni a, a tuk Thawhlehni zan khan Delhi atanga lo haw hlim bawk mi 1-in hrileg a kai tih hi hmuh belh leh a ni a, Nilaini zan zanlai khan Delhi atanga May ni 31-a rel hmanga Mizoram lo thlengte zinga mi, hmeichhe pathumin an kai tih hmuh belh leh a ni.
Nizan lama mi 5 hmuh belh lehte nen Mizoram chuan Covid1-19 kai mi 21 a nei mek a, tunah hian ZMC Laboratory-a sample endik mek 200 chuang result nghah mek a awm bawk a ni.
