Zu khapna dan thar, The Mizoram Liquor (Prohibition) Act 2019 chu Mizoram Assembly in pass tawh mah se, Lok Sabha inthlanpui vuakvet-a Model Code of Cunduct in a phuar avangin Election Commission chuan he dan thar hi inthlan zawhfel ni tur, May ni 27 thlen hma hmang \an rih lo turin March ni 28 khan Mizoram sorkar a hriattir a, hetihlai hian Mizoram sorkar chuan Zu zawrh phalna a pek, Bonded Warehouse neitute leh a zuar chhuaktu Vendor te hnena license a pek, March ni 31-a tawp tur chu renew a remtih loh avangin Mizorama Bonded Warehouse neitu pathumte chuan Gauhati High Court Aizawl Bench ah Writ Petition thehlutin, zu khawl khawmsa an neihte tih ral theihna hun siamsak turin an ngen a ni.
Bonded Ware house pathum, Raphael Bonded Warehouse, RTP Bonded Warehouse leh SS Enterprise te hian a hrang \heuhin Writ Petition hi an thehlut a, hengte hi Gauhati High Court Aizawl Bench Judge, Justice Michael Zothankhuma chuan a rualin a ngaihtuah a, a thutlukna hi vawiin khan tichhuakin Mizoram sorkar chu zu khapna dan thar hman theih a nih hma, May ni 27 thlenga an license renew sak tur leh a zuarchhuaktu Vendor te license pawh hapta khat ral hmaa renew sak turin a hriattir a ni.
Mizoram sorkar chuan March ni 8 khan thupek siamin sorkarin April ni 1 a\anga zu khapna dan hman \an a tum avangin zu zuartute chu an zu khawl khawm sa te March ni 30 ral hmaa ti ral vek turin a hriattir a, Bonded warehouse neitute hian zu khawl khawmsa an neih tihralna hun sorkarin a pek, ni 18 chu rei lo lutuk a ni an ti a, sorkar hian state pawn a\anga zu lakluh phalna permit chu February ni 26 ah pawh a la pek chhuah avangin zu dahkhawl sa tam tak an la nei tih court ah hian an thlen a ni.
Bonded Warehouse neitute hian State pawn lam a\anga zu an lakluh te chu sorkarin permit a pek hmanga an lakluh a ni a, chhiah zawng zawng pawh sorkarah an pe a, MLPC Act 2014 chu thlak a la nih loh avang leh dan dinglai a la nih bawk avangin, Lok Sabha inthlan a zawhfel-a zu khapna dan thar Mizoram Liquor (Prohibition) Act 2019 hman theih a nih hma chuan zu laluttute leh a zuartute license chu renew sak leh vek turin Court hian a ti a ni.
