Federation of Mizoram Government Employees & Workers FMGE&W hian an lehkha thawnah Mizoram Principal Home Secretary Election Commission thupeka sawn a nih chhan chu Chief Electoral Officer Pu SB Shashank-a’n thu dik lo hmanga a hek vang a ni tih an sawi a, Principal Home Secretary mawhphurhna hlihsak mai pawh ni lo, Mizoram pawna sawn chhuah hial a ni chu Election Commission in a thuneihna a hmangsual a ni tih sawiin, sorkar hnathawk dangte tan pawh inthlanna buaipui chu a him lo hle dawn a ni an ti a, Mizoram ang, state ralmuanga silai keng sipai, Central Armed Police Force tam tak chah luh tuma hmalakna pawh an hriatthiam loh thu sawiin, Election Commission chuan Mizoram sorkara dan leh thupek kengkawhtute a ringzo lo tih a lantir a, ECI Manual-in a tarlan anga State sorkar Home Dept nena ennawn leh an phut thu an sawi.
FMGE&W chuan Election Commission leh Chief Electoral Officer te hmalak dan chu Mizoram sorkar hnathawkte rin zawh lohna nia an ngaih thu sawiin, inthlanna buaipuitu tur Official zawng zawngte pawh state pawn lam a\anga thawn luh dan ngaihtuah mai turin Chief Election Commissioner chu an duh tih an sawi a, November ni 11 ral hmaa CEO nilai Pu SB Shashak chu sawn chhuah anih loh chuan inthlanna buaipui kawngah Election Commission thawhpui an tum loh thu leh Election Commission chu kum 2014-a a lo intiam tawh, Tripura-a awm Bru ten Mizoram chhungah ngei vote an thlak tawh ang tih chu ti hlawhtling tura an phut thu an sawi.
