FIR hi MPCC Media Department Secretary, Pu C. Lalhriatpuia leh a thawhpuiten ACB SP mawhphurhna la mektu Pu J. Lalmuankima hnenah an thehlut a, Mizoram Sorkar-in March ni 27-a PPE set sing 1 leh za 9 a chah thlen zinga engemawzat chu hman tlak loh a ni tih hriat a nih thu FIR ah hian an ziak lang a ni.
MPCC hian April ni 4-a Covid 19 Medical Operational Team Leader, Dr. ZR Thiamsanga’n thuchah a tihchuah-ah PPE chu mamawhna a san em avanga hnawhsarum taka lakkhawm a nih thu leh a \ha leh \ha lo thliar theih a nih loh thu sawi a ni an ti a, PPE lei danah Sorkar thuneitute leh a supply tute inkarah eiruk theihna kawng tam tak a awm nia a lan thu an sawi a, PPE lei nan hian cheng vbch. 1 dawn sen a nih thu te, hman tlak loh a awm anih chuan mipui sum awmze nei lova luanral tirna a nih thu te, PPE chu Covid 19 dona kawnga thawktu ber Damdawi lama thawkte hman tur a nih thu leh PPE \ha lo pek an nih chuan dinhmun hlauhawm taka dintirna a nih thu te FIR ah hian an ziak lang a, thil dik lo nia sawi hi chhui chianga mawhphurtute hrem an nih theih nan hmala turin ACB chu an ngen a ni.
FIR dawngtu Pu J. Lalmuankima chuan ACB chu thubuai chhuitu, Investigating Agency ni mah se, mahni thu-a thubuai chhui thei an ni lo tih MPCC hruaitute hi a lo hrilh a. Dan angin thubuai an dawn hi Vigilance Department-ah thawnin Preliminary Enquiry tih phalna an dil ang a, anni’n Lokayukta lamah an thawn chhawng ve leh ang a, Lokayukta hian thubuai hi chhui tlaka a ngaih chuan chhui a nih tur thu a lo hrilh a ni.
FIR an thehluh hnua thuthar lakhawmtute an kawmnaah MPCC Media Department Secretary, Pu C. Lalhriatpuia chuan PPE lei chungchanga FIR an thehluh chhan chu Politics hmanga inbeihna a ni satliah lova, mipui chanai sum bo thlau thei veng tura hmalakna a ni a ti.
