Mizorama HIV leh TB veite enkawlna tihchak a nih theih dan tur zirbingna kalpui mek chungchang vawiin khan Health Minister, Pu Lal Thanzara hovin Aijal Club-ah sawi ho a ni. HIV leh TB veite enkawlna tichak tur hian Indian Council of Medical Research leh Health and Family Welfare Ministry hnuaia Central TB Division tanpuinain zirbingna chi hnih – Project Nauban leh Project Red Cap kalpui mek a ni a, Project Nauban hnuaiah hian Central Jail-a tangte zinga HIV/AIDS veite chu zirchian an ni a, TB an vei leh vei loh thlenga enfiah an ni. He Project hi MSACS Dy Director, Dr. Malsawmtluangi Ralte kaihhruaina hnuaiah kalpui a ni. Project Red Cap bik chu MSACS State Epidemiologist, Dr.Richard Lalramhluna Chawngthu kaihhruainaa kalpui niin, damdawia inchiu thinte zinga TB natna vei tam dan an zirchiang thung a ni. Vawiina he hmalakna hnuaia hnathawh dan thlir hona hi NHM Mission Director, Dr. Lalrozama’n a kaihruai a, District hrang hranga TB program enkawltute, Health Department aiawh leh HIV veite enkawltu tlawmngai pawl hrang hrangte an tel a ni.
