Vawiina damdawi in chhuah sante hi Serchhip Dedicated Covid Health Centre-a enkawl mi pahnih, leh Lunglei Dedicated Covid Health Centre-a enkawl hmeichhe 1 an ni a, Serchhip-a damte hi nufa an ni. Heti hian Mizorama Cocid 19 hri kai hmuh chhuah tawh 160 zinga 126 chu enkawl dam an ni tawh a, enkawl mek hi 34 an la awm a ni.
Hnahthial District chu hri kai la awm lohna District a ni chhunzawm zel a. Lawngtlai-a hri kai 8, Saitual-a hri kai 3 leh Kolasib District-a hri kai 11 chu enkawl dam vek an ni tawh a. Covid 19 hri kai hmuh chhuah tamna ber Lunglei District-a hri kai enkawl 47 zinga 46 dam tawhin, enkawl mek mi 1 a la awm a. Mamit-a hri kai enkawl lai 10 an awm a, chung zinga 4 chu hri lakah an fihlim thei dawn nia ngaih a ni a. Aizawl District-a hri kai hmuh tawh 38 zinga 31 dam tawhin, mi 7 enkawl mek an ni a, Siaha-a nimina hri kai hmuh belh mi 9 nen hri kai enkawl mek 10 an awm a, Siaha-ah hian mi 8 an dam tawh a, Champhai-a hri kai 9 zinga 5 dam tawhin, Serchhip-a hri kai 3 an dam kim tawh a. Khawzawl-ah pawh hri kai 2 zinga 1 a dam tawh a ni.
Nimina ZMC Covid-19 laboratory-a sample endik 397 zinga 382 chu hri lakah an fihlim tih finfiah a ni a, sample 15 endik mek an ni a. Chungte chu Aizawl District mi 10, Champhai 3, Lawngtlai leh Mamit District 1 ve ve an ni. Vawiin khan ZMC Covid-19 laboratory-ah Sample endik chhunzawm zel a ni a, zaninah result hriat theih beisei a ni. Vawiin khan Falkawn damdawi inah Covid 19 vei rinhlelh mi 1 ICU-ah admit thar a ni a, a sample endik nghal niin, zaninah result hriat a ni ang.
ZMC Covid 19 Laboratory-ah vawiin thlenga Covid 19 hri kai hmuhchhuah tawh chu mi 159 an tling tawh a, ZMC-a Laboratory awm hmaa hri kai hmuh tawh pakhat nen Mizorama hri kai zawng zawng chu 160 an tling tawh a, ZMC bikah mi 47 enkawl dam an ni tawh a. Tun dinhmunah damlo enkawl mi 7 an awm a, an zingah harsatna nei an awm lo a ni.
