Zonet zawhna chhangin Home Minister chuan, Sipai-te chu Central Force an nih avangin State sorkar tan hmalak a harsa tih a sawi a. Hetihrual hian, sipai zingah hri kai an pun zel bawk si avangin hri an thehdarh zel loh nan theih ang anga hmalak a ni, a ti.
Home Minister chuan, Lunglei lama awm BSF Battalion chu insawn tur leh an mahni thlak tur chu South India lam atanga lo kal tura tih an ni tih a sawi a. Tun boruakah chuan thil tih chi ni-a a lan loh avangin insawn rih lo tur leh an mahni thlaktu tur midang lo lut rih lo turin Sorkar laipui lamah thlen a ni tawh tih a sawi.
Loh theih loh-ah lo chuan sipai-te chawlh in pe lo tura ngen an nih chungchangah State sorkar tan thu pek ngawt theih a nih loh avangin Assam Riffle leh BSF chu Mizorama an hotu DIG hnenah leh CRP chu Commanding Officer hnenah rawtna hi thlen a ni tih Home Minister Pu Lalchamliana hian a sawi.
Inrinni atanga nimin thleng khan Mizorama awm Sipai zinga mi 53-in hri an kai tih hmuh chhuah a ni tawh a. Hri kai hmuh hmasak ber Inrinni khan Lungverh-a awm National Disaster Response Force mi 10, Zokhawthara awm Assam Riffle mi 4 leh Lungleia awm Border Securuty Force mi 2, an vaiin mi 16-in hrileng an kai tih finfiah a ni a. Heta tang hian Sipai zingah ni tin hri kai hmuh belh ziah a la ni a, Pathianni-ah Lungleia BSF mi 5, Thawhtanni-ah Lungverh-a NDRF mi 5, Thawhlehni-ah Lungleia BSF mi 3, Nilaini-ah Serchhip Dawngzawla BSF mi 2 leh, nimin, Ningani-ah Zokhawsanga AR mi 15 leh Lungverha NDRF mi 7, an vaiin mi 22-in hri kai tih hmuh belh leh a ni.
