MZU Mizo Zirtirtu Forum hian sorkar sum renchemna austerity measure chak taka kalpui an rawt a, hri leng vangin tun dinhmunah hmasawnna ruhrel lian tham din belh a harsat dawn avangin, sorkar inrelbawlna leh mipuite rawngbawlna kawngah awmze nei zawka kal theihna remchang a ni an ti a, hrileng zawh huna kalphung thar tur, Post Covid 19 policy siam an rawt a ni.
Mizo Zirtirtu Forum hian thlai thar lei leh hralh danah kalphung mumal tak duan chhuah an rawt a, khaw hrang hranga thlai thartute leh a buaipui chhawngtute inkhaidiak dan langtlang leh awmze neia buaipui thei turin technology hman tangkai te, a theih chinah tualchhung sumdawng local entrepreneurs ten thlai thar lei leh hralh chhawn an buaipui theih dan tur kawng hawnsak te an rawt a, sorkar leh dept. lam chu remchanna chhawp chhuaktu leh a thununtu ni se tih an rawt a ni. Buh leh bal thar chhuak tam tura lo neitute fuih mekah a dolet turin sorkarin ruahmanna a siam a ngai tih an sawi bawk a, mipuite hnena buhfai sem chhuah dan TPDS leh food security Act hnuai buhfai lei danah tualchhunga thar chhuahte lei dan ruahmanna tha siam nise an ti a ni.
Hnathawktute mumal taka enkawl leh chhawmdawl an nih theihna turin Labour Policy Reform kalpui an rawt bawk a, hnathawktu awmzat leh an dinhmun mumal taka chhinchhiah a nih theihna turin common service centre te hman tangkai an rawt a, ILP pek chhuah dan pawh sorkar hriatpuia a buaipuitu tur, recognised manpower agency te neih an rawt a, hei hian ILP pek chhuah leh hnamdang hnathawktute vilzui kawngah kalphung tha zawk a thlen dawn a ni an ti a, labour database tha tak a awm chuan an hamthatna tur ruahmanna siam kawngah a pui dawn a ni an ti.
MZU Mizo Zirtirtu Forum hian hrilengin a nghawng nat tur hnathawhna hmun hrang hrang zirchian leh chutiang hmuna thawk thei tura thalaite thiamna chher hriam kawngah hmalak an rawt bawk a, hri leng vanga internet kaltlanga mahni in lam atanga hnathawh leh online class ang chite kalpui mek chu remchanga hmangin Digital Infrastructure Policy awmze neia kalpui an rawt bawk a. An rawtna hi Chief Secretary hnenah an thehlut a ni.
