A hawnna inkhawm vawiina CM Conference Hall-a neihah Pu Zoramthanga chuan, HIV chu Mizoram mai ni lo, khawvelin a buaipui a nih avangin a do kawnga hmalak chu a pawimawh hle a ni, a ti a. Tunhma chuan phar te, TB leh Cancer chu thihpui tur natnaa ngaih \hin a ni a, a tihdamna damdawi hmuhchhuah a nih hnuah, mi tam takin an dampui tawh a, HIV erawh a tihdamna tur hmuhchhuah ala nih loh avangin a kai lo tura mahni invawn uluk chu a tih dan \ha ber a ni a ti a. Chumi rual chuan mahni thiam loh ni lova kai palh theih a nih avangin he natna-in taksa a tihchhiat loh nana inenkawl chu tih makmawh a ni a, mithiamte thurawn ngaih pawimawh a \ul hle a ni, a ti.
Pu Zoramthanga chuan, Mizoramah HIV vei an pung zel a, India ramah AIDS vei tam lama pakhatna a ni hial chu pakhatna nih rau rauah a chhuanawm loh avangin a do kawngah nasa zawka \anlak a \ul hle tih a lang a, he natna hian tumah a zuah loh avangin naupang ber a\anga a upa ber thlenga fimkhur a ngai a ni a ti a, Pathianin mihringte tan warning hnuhnung a pek pawh a nih theih avangin mi tinte Pathian hnaih chunga an nun uluk \heuh turin a chah a ni.
He inkhawm Aizawl Bawrhsap, Pu Vanlalngaihsaka kaihhruaiah hian MSACS Project Director, Dr. Lalthlengliani’n Mizorama HIV dinhmun tlangpui a sawifiah a. HIV kai lo tura inzirtirna atan thuziak an tarah mipat hmeichhiatna hmang lo thei lote Condom hmang tura an fuih chu mi \henkhatin Condom an sawimawina-ah an ngai a, hei hi a dik lo tih sawiin, Mizorama HIV kai tam zawk chu mipat hmeichhiatna hman khaw loh a\anga kai an nih avangin a insum thei lote chu natna \ha lo an kai loh nan Condom hmang tura inzirtirna mai a ni, a ti. Dr. Lalthlengliani chuan, vawiin thlengin Mizoramah AIDS vanga thi mi 2,000 vel an awm tawh tih a sawi a, India ramah HIV chu a hniam zawnga a kal mek laia Mizoramah erawh he natna vei hmuhchhuah an pung tulh tulh chu a mangang thlak hle a, thisen endik tawh a\angin Mizoram mipui za zela mi 2-in HIV kai ang an ni a, he natna kai tam ber chu mipat hmeichhiatna a\anga kai an nih avangin inenfiah a \ul tak zet a ni, a ti.
MSACS Project Director chuan, zirchianna a\anga a lan danin, HIV do kawngah hian ram hruaituten tih tak tak nena an do a, Department hrang hrang, tlawmngai pawl leh Kohhran-te nen thapui thawha an beih chuan he natna hian zual lam pan lova a tlakhniam theih beisei a nih avangin thawh hona \ha neih a pawimawh hle tih a sawi.
Chawhnu lamah District AIDS Prevention & Control Unit-a District Programme Manager, Dr. R. Zonunmawii’n HIV do kawnga beihpui thlak dan tur ruahman sawiin, hei hi huam zau zawka sawi zui a ni bawk. MSACS hian HIV/AIDS Sensitization Campaign hi Department hrang hrangah pawh an nei chhunzawm zel dawn a ni.
