Mizoram sorkarin Mizoram Home Guard-a Director General post siam leh tuma hma a la chu Ex Servicemen te chanvo chhuhsak tumnaah an ngaih thu Mizoram Ex Services League Vice President Hony. Capt. Ngura Sailo a’n an pisaaah vawiin khan Press mite a hrilh a. Hony. Capt. Ngura Sailo chuan, Dan lova Mizoram sorkar in a din MRHG Director General post chu High Court in a tihtawp sak hnu thla 2 pawh a ral hmain he Post siam a nih leh theihna turin Mizoram Home Guards Act, 1985 chu tih danglam tumin sorkarin hma a la niin a sawi a, he thil hi Mizoram Police te hleihluak taka duhsakna niin a sawi. Hony. Capt. Ngura Sailo chuan, Mizoram-a Ex-Servicemen ten Sainik Welfare & Resettlement leh Home Guards & Civil Defence Department chu sipai bangte hnathawhna tur leh kawng hrang hranga an hman \angkai theih Department pawimawh an nih thu a sawi a, hetihlaia MRHG Department-a a lu ber post, tuna Ex-Serviceman officer awm reng chunga Ex-Service te tana chelh theih ngai tawh loh tura dan tih danglam chu an duh lo tih sawiin Ex-Service te hamthatna chhuhsak tumna lian takah an ngaih thu a sawi a, hemi chungchang hi Mizoram Governor leh Chief Minister hnenah pawh an an thlen tawh tih a sawi bawk.
