Mizoram sorkar aiawhte leh HPC(D) hruaitute, thla hlui, September ni 21 leh ni 22-a Aizawla remna kawng zawnga an inbiaknaa inremna siam dan tur chungchanga rawtna an siamte chu Hmar Inpuiin a pawm. HPC(D) hruaitute hnen a\anga ZONET thu dawn danin, Inremna thuthlung siam dan tur ruahman hi kar kal ta khan Churachanpur-a Rengkaiah HPC(D) Council aiawhin Hmar Inpui chuan a bih chiang a, \ha tawka ngaiin a pawm a, he inkhawm hi Hmar Inpui President, Pu Joseph Lalrothang-in a kaihruai a ni. Puan tawh angin, September ni 22-a Aizawl State Guest House Conference Hall-a inbiakna zawh fel tak kha Mizoram Sorkar leh HPC(D) helpawl inkara official level-a inbiakna zawh felna a ni a, an inbiak leh hunah chuan Minister hovin Political level-ah a ni tawh dawn a ni. Home Minister, Pu R. Lalzirliana chuan ZONET zawhna chhangin inbiak leh hun atan kumin Krismas hma lam thlir mek niin a sawi. He inbiakna kal meka a hmawr bawk dan tur chungchangah HPC(D) chuan Sakawrdaiah mipuite biakrawn a tum niin HPC(D) hotute chuan an sawi a, amaherawhchu, a hun atan tun thla ni 24 lo ruahman lailawk tawh chu tipuitling turin an inpeih hman dawn lo niin an sawi.
