Khawlaia mihring leh lirthei vei vak tih tlemna tur leh hnathawhna hmunah social distancing a awm theih nan thupek thar hi sorkarin a siam a, thawktu zawng zawng pisa kai vek tura tih tun dinhmuna Dept pawimawh zual thenkhat tih loh, Dept dang zawngah chuan Group B, C leh D hnathawk zawng zawng hmun thuma thena hmun khat zel chauhin pisa an kai ang.
Secretary, Head of Department leh Head of Office te chu office inkai chhawk dan tur ruahmanna siam tur leh Thawhtanni atanga hman nghal tura order tichhuak nghal turin sorkar chuan a hriattir a. Pisa kai tur te’n Office Order copy, detailment order leh an ID card chu vei vah phalna atan an hmang nghal thei ang a. Heng document te hi a tul huna Police leh Local Level Task Force duty te en turin an kawl reng tur a ni.
Hei hi tul lova Sorkar hnathawk mahni duty loh nia an vei vak tur venna atana tih a ni a, sawrkar hnathawk nih vangin duh duh hunah a chhuah ngawt theih loh tih sorkar thuchhuah chuan a sawi.
Sorkar Dept hotute hian a tul a nih chuan order dang chhuahin Group B, C & D hnathawkte hmun thuma thena hmun khat aia tam office kal turin an ruat thei dawn thung a. Staff zawng zawng ten an pisa kai loh ni ah mobile phone an switch off tur a ni lova, biak theih leh in atanga office hna tul apiang thawk thei turin an inring reng tur a ni.
Tun dinhmuna mipui tana pawimawh zual Dept thenkhat, hnathawktu zawng zawng kal vek tura tih te hi Health Services, Police, Home Guards & Civil Defense, Fire & Emergency Services, Disaster Management, Civil Aviation, Prisons, Excise & Narcotics, Municipal Services, Forest Field Works, PHE leh P&E te an ni.
