Vawiina an Party Pisa inkhawmah Prism hian Mizoram sorkarin Mizoram ramriah Bengal Eastern Frontier Regulation 1875-in a sawi ang a tichiang thar chu lawmawm an ti a. Sorkar-in ramri a tihchian mil hian Mizoram sorkarin Map thar a tichhuak mai dawn emaw an tih laia a tihchhuah tak mai loh avangin mipuiin a nihphung tlangpui an hriat theih nan Mizoram Map thar hi siam a ni, tih an sawi.
He Map thar hi a duh apiang hmuh theih turin an pawl President, Pu Vanlalruata’n a tlangzarh nghal a. Prism hian Sorkar laipui leh Naga helpawl inbiakna kal mekah Nagaland-in Naga chenna chin ram a huam tur thu te, Constitution hran leh Flag hran neia Self Determination nei tur anga sawi chungchang pawh sawi hovin, Mizote dinhmun aia sanga Naga dah tum nia lang chu a hlawhtling a nih phawt chuan an dinhmun angah Mizote pawh an awm ve tur nia an ngaih thu an sawi a. Mahnia ro inrel theihna tura dikna leh chanvo hi United Nations Declaration on the Rights of Indigenous Peoples-in a pek mai bakah Mizo hnamin an lo beih tawhna leh tuar tawhna avanga phu hlea an hriat thu an sawi a, a hlawhtlin theih nan theihtawp chhuaha hmala turin Mizoram sorkar chu PRISM Party hian an phut a ni.
