Aizawl Vanapa Hall-a he Ni lawmna inkhawm hi Chief Secreary mawhphurhna latu, Pu Lalhmingthanga’n a kaihruai a, a hmanpuitu Chief Minister Pu Zoramthanga chuan, remna champha kum 30 zet a lo ni ta chu lawmawm a tih thu a sawi a, India sorkar leh MNF-in inremna an ziah khan Mizoram mipuite hlimna nasa tak a thlen a, hei hi thil lawmawm tak pawh ni se Politics avangin hun rei tak hman lohvin a awm a, a zuih ral lek lek hman a, tunah erawh chuan zawi zawiin \hatharte leh a ngai pawimawhtuten an hlut telh telh a ni, a ti a. India sorkar-in ni pawimawh pahnih a neih chu Republic Day leh Independence Day a ni a, Mizoram pawhin ni pawimawh a neih zingah Mizoram State Day leh Remna Ni chu ngaih pawimawh a nih tur thu a sawi.
India sorkar leh MNF-in inremna thuthlung an ziaha Mizoram sorkar aiawha hming ziaktu khatihlaia Chief Secretary, Pu Lalkhama chuan, inremna thuthlung chu mi tinin an hlut tur a ni tih sawiin, tu tan mah bawhchhiat mai mai chi a ni lo a, an ngaisang tur a ni, a ti a. He thuthlungin a ken zingah Mizo Nation chu India sorkar-in a pawm tihna a ni a, chumi tichiangtu chu Mizo nunphung awmsa reng reng Mizo mipuiten an remti a nih loh chuan Parliament-in a \huta ngawt thei lova, hetiang dinhmun ropui taka Mizoram a awm theih chhan chu MNF vang a ni a, hnam sipai zingah rethei taka awm an la awm a nih chuan sorkar-in an dinhmun ngaihtuah se a duh hle tih Pu Lalkhama chuan a sawi.
Central YMA President, Pu Vanlalruata pawhin, \angthar zingah remna hlut zia hrethiam phak lo tam tak an awm tawh tih sawiin, remna chu a hlut mipuiin an hriat theih nan tun aia uar deuh zawka hman zel \ha a tih thu a sawi a. Mizoram chu kawng hrang hrangah hma a la sawn tawk loh avangin remnain a ken tel hmasawnna tak tak nei tura \anlak \ul a tih thu a sawi. Pu Vanlalruata chuan, remna leh muanna \ha tak a awm tawh laia a tichhe thei thil lo awmte do kawngah pawh nasa lehzual \anlak a ngai tih sawiin, ruihhloin \halai a run a, chumi rual hian thi an tam a, piang an tlem telh telh bawk si avangin heng harsatna hrang hrang thleng thei laka him tura \anlak a \ul hle tih a sawi. Vawiina Remna Ni lawmnaah hian sorkar hnathawk leh mipui \hahnem tak an tel a ni.
