Kum 2020 a\anga kum 5 chhunga state hrang hrangte sum hman tur ruahmantu tur leh Central leh State inkara chhiah in sem dan tur duangfeltu tur 15th finance commission Chairman Pu Pu N. K. Singh hi member dangte leh mipawimawh dangten an \awiawm a, Mizoram sorkarin sum mamawh a thlente hi Pre Devolution Revenue Deficit Status atan cheng vaibelchhe 57,737.38; Capital Expenditure-ah cheng vaibelchhe 17,357.90; Sorkar bungraw pawimawh leh thil neihte enkawlna turin cheng vaibelchhe 5779.00; 7th Central Pay Commission Mizorama kalpuina turin cheng vaibelchhe 1283.70; chhiat rupna lo thlen thulha hmalakna tur State Disaster Relief Fund leh State Disaster Mitigation Fund atan cheng vaibelchhe 1000.00; Village Council, AMC, Autonomous District Council-te leh Sinlung Hills Council te hman turin cheng vaibelchhe 2292.39; ramngaw enkawlna Forest Maintainance atan cheng vaibelchhe 1450.00 leh State sorkar mamawh bik Specific Needs tihpuitlinna turin cheng vaibelchhe 7746.96 te a ni.
Fifteenth Finance Commission hian nimin chawhnu khan New Capital Complex Conference Hall-ah Mizoram Sawrkar hotulu te – Chief Secretary Pu Lalnunmawia Chuaungo leh Commissioner leh Secretary rualte an kawm a. Meeting chhawng khatnaah Mizoram sorkar aiawhte hian sum mamawh te thlenin an mamawh chhan te an sawifiah a. Meeting chhawng hnihnaah khawpui inrelbawlna leh enkawlna chungchang sawiho a ni a, a chhawng thumnaah Village Council te tih changtlun zelna tura sum mamawh te sawiho a ni.
Chief Secretary Pu Lalnunmawia Chuaungo chuan kum sawmhnih chhung Mizoram a buai avangin state dangte tehkhinin hmasawnna lamah Mizoram chu a hnufual bik a, hmasawnna ruhrel din kawngah te, inkalpawhna lamah te leh thil dehchhuah lamah te, Mizoram chuan a bika enkawl a mamawh a ni a ti. Finance Commission Secretary Pu Lalmalsawma’n Mizoram sum leh pai dinhmun leh sum mamawh dan te a sawifiah a, UD&PA Secretary Dr. C. Vanlalramsanga’n Urban Local Bodies dinhmun leh sum mamawh te sawifiahin LAD Secretary Pi Zoramthangi Hauhnar in VC te dinhmun leh an sum mamawhte a thlen bawk.
