Higher and Technical Education Minister, Pu R. Romawia’n Mizoram Quota-a damdawi lam zir tur thlannaa Category-I a Zo hnahthlak chauh telh an ni chu hnam dangte en hranna vang a ni lo, a ti. Vawiin khan thuthar lakhawmtu thenkhat hnenah Minister chuan, Indigenous tih chu Constitutional Language ni lovin, Historical language niin a sawi a, British hovin India an awp lai kha chuan Lushai leh Lakher chauh, Mizo Indigenous-ah telh an ni a, kum 1947-a India-in zalenna a hmuh hnu, kum 1950-a Tribe List siam that a nih khan Chakma leh Bru-te chu Mizorama cheng zingah telh niin a sawi. Pu R. Romawia chuan, tun hma lamah chuan damdawi lam zirna hi Health Department kutah a awm a, Higher and Technical Education Department a indan hnuah a zir tur thlanna hi an buaipui chhunzawm ta nia sawiin, dan siam hmasak ber chu Silchar lam mi-in Court-a a khin avangin hman theih a ni lova, kum 2016-a dan siam that a nih khan Category thum siam a ni a, Category-1 ah Zohnathlakte dah an ni a, an tan seat zaa 95 hauh a ni a, Category-II ah Mizorama cheng, Zohnathlak ni lote dahin, an tan seat zaa 4 dah a ni a, Category -III chu Mizoram khua leh tui ni lo, Mizoram sorkar hnuaia thawkte tan tih a ni thung a, an tan zaa 1 dah a ni a. Category-II ah Mizorama cheng, Zohnathlak ni lote dah an ni chu anmahni en hran vang ni lovin, an chanvo an hmuh ngei theihna tura duhsak taka siam a ni zawk nia sawiin, kum 6 hma lama Zohnahthlak ni lote dinhmun thlir chunga zirna sang zawk an chan ve theihna tur a nih avangin, Gorkhali-te phei chu an lawm hle zawk niin a sawi.
H&TE Minister chuan, Chakma zirlaiten nikumah The Mizoram (Selection of Candidates for Higher Technical Course) Rules, 2016 an khin avangin he dan hi hman theih a ni lova, loh theih lohna avangin dan hlui hman a ni a, Court-in he dan hi hmang rih lo turin hriattir mah se, he dan hi nuai bo a nih chuan loh avangin kumina damdawi lam zir tur thlannaah kha chuan dan hlui hman leh ai chuan dan awm sa hi hman thaa hriat a nih avangin he dan hi hman a ni ta a, he dan hman a nih avanga mithenkhatin inen hranna nia an ngaih chuan, an hriat chian loh vang nia a ngaih thu a sawi. Pu R. Romawia chuan, nikuma The Mizoram (Selection of Candidates for Higher Technical Course) Rules, 2016 siam a nih tum pawh khan Chakma zirlaite chu Category-II a dah chungchang hi a lo sawipui tawh nia sawiin, Zohnahthlak an nih theih loh avangin Mizorama cheng Zohnahthlak ni lote tih chu pawm mai turin a lo ngen tawh niin a sawi a, an pawm theih loh avanga he harsatna hi lo chhuak ta niin a sawi bawk.
