Mizoram Quota-a BDS zir turte tan vawiin khan Chaltlanga Higher and Technical Department, Technical Wing Pisa-ah Counselling neih leh a ni a, BDS zir turin mi 7 hnenah Seat pek a ni. Technical Wing hotute sawi danin Counselling hi BDS Seat ruak 3 hnawh khahna tura buatsaih nimahse, kar kalta Zirtawpnia MBBS leh BDS zir turte tana Counselling neih tawh a BDS zir tura thlan zinga zirlai 4-in an zawm theih loh tur thu an sawi leh avangin vawiin khan BDS Seat 7 hnawh khahna turin Counselling hi neih leh niin an sawi a ni. Hetah hian zirlai 25 an inlan a, zirlaite hi National Eligibility & Entrance Test (NEET)-a an tihthat dan indawtin Seat thlan tir an ni a, Allotment pawh pek nghal vek an ni.
Puan tawh angin Central Pool atanga Mizoramin damdawi lam zirna tur Seat a neih hnawhkhat turin kar kalta zirtawp ni khan Counselling hi neih a lo ni tawh a. Hetah hian MBBS atana Mizoramin Seat a neih zawng zawng 17 chu pek chhuah vek a ni a, BDS-a Mizoramin Seat 9 a neih zinga 6 chauh pek a ni thung a, BDS thlang zinga mi 4 chuan an zawm duh loh avangin BDS Seat ruak 7 hnawh khat tur hian vawiin khan Counselling hi buatsaih that leh a ni. Damdawi lam zirnaah hian Mizoramin Central Pool atangin seat 24 leh North Eastern Council hnuaiah seat 11 a nei a ni.
