Congress Party hruaitute hian Mizoram sorkarin hri leng mek, Covid-19 enfiahna laboratory chu sawi loh, PCR Analyser tak ngial pawh ala nei lo chu a lungchhiatthlak a ni an ti a, Chief Minister-in sum a vaibelchhe tela a beisei loh lam atanga a dawn thu a sawi laia COVID-19 financial assistance ala puang ve lo te chuan mipuite a ti ralkhel zual hle a ni an ti a. COVID-19 darh zel laka mipuite an him theihna tura khum tlemte dah hran bak inpuahchahna mumal sorkarin a nei lo nia sawiin a manganthlak hle a ni an ti a, District Hospital-ah te phei chuan inpuahchahna mumal sawi tur a awm lo a ni an ti.
Congress party hruaitute hian COVID-19 laka Mizoram himna tura inpuahchahna chu zin veivak paha ngaihtuah mai mai tawkah Chief Minister berin a ngai niin a lang an ti a, a zinna hmun pakhatah Health Minister pawh a tul ang anga finance lama a mamawh lo dap rawk rawk tura a hriattir thu Chief Minister in a sawi a ni an ti a, khawvel pumpui ti chi-ai tu hripui laka sum leh paia inbuatsaihna tur zin veivah paha a sawi liam mai chu hriatthiam a harsa a, Mizo mipui thlabar taka awm mekte an lainatawm hle a ni an ti.
He hrileng laka mipui lo inven lawk chu tun dinhmuna tih theih tawk anih rih avangin Congress party chuan mipui punkhawm theihna ang chi party hmalakna tur an lo duan lawk tawh zawng zawng an chawl lailawk rih tih an puang a, hei hian District tina party hmalakna kaltluang pangngai, Thawh\anni-a chhung inkhawm leh Zirtawpni-a Political Session an neih \hinte pawh a huam tih an sawi a, Local Council leh Village Council inthlanna lo awm tur atana zinchhuahna tur an duan lawkte pawh \hulh vek a ni tih an puang a ni.
