Mizoram Pradesh Congress Committee-in Tripura ramri-a duty 5th IR Batallion mi pahnih Tripura Chakma ten kut an thlak chu an dem thu an sawi a, he thil thleng hian COVID-19 dona kawnga Mizoram sorkar ruahmanna fel tawk loh zia a ti lang a ni an ti.

MPCC hian, Mizoram sorkar-in inkharkhip a kalpui danah Police leh Magistrate-ten dan leh thupek kengkawh lova, Task Force te rin zawk an nih avangin Mizoram Police-te hlutna nasa takin a tlahniam a ni an ti a. Home Minister, Pu Lalchamliana chuan mawh a phur lian hlea an ngaih thu an sawi a, Task Force-te kianga duty Police-te, tih tur mumal nei lova an awm avangin zah an hlawh loh phah a, kut hial an tawrh phah ta nia an ngaih thu an sawi.

MPCC chuan, Police 2-in kut an tawrh chungchangah West Phaileng Police Station-a FIR thehluh a nih laia Tripura Police-in pawikhawihtu nia hriatte an man leh, Kanchanpur Chief Judicial Magistrate-in bail-a a chhuah chu pawi an tih thu an sawi a. Pawikhawihtute hi an pawikhawihna Mizoram chhung ngeia an chungthu ngaihtuah a nih theih nana chak taka hma la turin Home Minister Pu Lalchamliana an phut a ni.

MPCC hian Pu Lalchamliana chu Home Minister anih bakah, Disaster Management & Rehabilitation Minister a nih angin COVID-19 donaah a phusa berte zing ami ni tura ngaih a ni an ti a, hetihhlaia DM&R Minister a ni tih pawh hriat mang loh khawpa a awm chu mak an tih thu an sawi a, hun khirh laia ram hruai hna thawk tlak lova an ngaih thu an sawi.