MPCC hian, COVID-19 vanga inkharkhipna Mizoram hmun tam takah thlahdul chhoh mek a ni a, Local leh Village Level Task Force tam tak pawhin duty runpui an chawlhsan mek a ni an ti a. Hetih lai hian ramri hmun hrang hrangah ramri vengin Police, VLTF leh volunteer-te ngawrh takin an duty reng a ni, April ni 19-a IGP (Law & Order), Pu LH Shanliana sawi danin, khaw chhak leh khaw thlang ramri hrul hmun 135-ah Police 700 vel an duty bakah Village Level Task Force-te pawh hmun 198-ah mi 2,000 aia tlem lo nitin an duty a ni, an ti.
Ramri-a Duty Police tam zawk te chu dinhmun chhe takah an awm mek niin MPCC hian an sawi a, ei tur an dawng mumal lova, power supply pawh nei mumal lo an tam a, mahni sum senga an mamawh tam tak an inngaihtuah chawp a ngai a, Police duty tam tak phei chu Village Level Task Force-in tanpuina an pe hial zawk niin MPCC hian an sawi a. VLTF leh YMA duty zingah pawh eizawnna kawng an zawh theih loh rei tawh avanga talbuai, duty hleithei tawh lo engemawzat an awm mek niin an sawi a, ramri-a duty police-te chu hlawh tam zawk sorkarin a pe thei lo a nih pawhin, thuam tha lehzual tur leh, ei tur pawh hnianghnar zawk pe tur te, Puan In pangngai deuh leh thil tul dangte a rang thei ang bera ngaihtuahsak tur tein sorkar an phut a, ramri vengtu VLTF leh YMA duty-te chu tha hah man pe turin Mizoram sorkar an phut bawk a ni.
