Mizoram Pradesh Congress Committee (MPCC) chuan thuchhuah siamin, MURA nena kum 2008 leh 2013 inthlan dawna inremna thuthlung an lo siam tawh chu ti hlawhtling turin Sorkarin \an a la mek nia sawiin, tihhlawhtlin tawh pawh engemawzat a awm niin an sawi.
MURA member zinga mi pahnih sorkar hna pek an ni tawh nia sawiin, Mizoram Home Guard-ah mi 7 thun a ni tawh bawk niin an sawi a, PHE leh Rural Development Department-ah Contract hna engemawzat pek an ni tawh nia sawiin KVI Board-ah an member zinga mi 3 ruat an ni a, Kolasib-a mi 8 hnenah BPL in sak \anpuina cheng nuai 1 leh sing 5 \heuh pek an ni tawh a, Rangva Bundle 160 pek an ni tawh a, LAD Housing Loan Board member-ah mi 2 ruat an ni a, NLUP Cm special Package a\angin mi 50 leh NLUP pangngai pawh mi engemawzat pek an ni tawh a, MURA member chhungkaw 60 te chu an inhmun tur LSC pek an ni tawh a, Two wheeler taxi, Sumo leh Taxi Permit pawh \hahnem tak pekchhuah an ni tawh niin an sawi.
Hengte bakah hian Minister hrang hrangin Computer leh Supply hnate an pe nia sawiin, kumin May ni 31-a an inbiak \uma thil phut thar an sawite chu Sorkar-in ngun taka a ngaihtuah hnuah an thilphut 1-na leh 2-na chu Sorkar kalphung pangngaia tihhlawhtlin theih nia a lan loh thu leh MURA member-te chu chaw an nghei mek chu titawp tura an duh thu an sawi a ni.
Hetih rual hian MURA chuan thuchhuah siamin, MPCC President Political Secretary-in Ultimatum hmanga an inremna thuthlung Sorkar-in a tihhlawhtlin tawh dan an tarlan chu thu belhchian dawl lo niin an sawi ve thung a. Kolasib-a SS zirtirtua thun nia an sawi Pi Biakveli chu Biakvuli tihzawk tur a nih thu leh amah hi MURA hminga thun nia an hriat loh thu an sawi a, Lawngtlaia Forest Deptt.-a LDC an dah nia an sawi Pi Lalhunmawii chu Pu C. Ramhluna, PCCF a nih laia a thun a nih thu leh hei hi Congress Sorkar hma a nih thu an sawi a. Home Guard-a mi 7 thun tawh anga sawi chu a dik loh thu leh mi 2 bak thun an la nih loh thu te, PHE leh Rural Development Department-a Contract hna pek tawh anga an tarlan chu Work Order an hmuh loh thu te, Kolasib-a mi 8 hnenah BPL insak \anpuina cheng nuai 1 leh sing 5 pek anga sawi pawh an hriatpui loh thu sawiin, NLUP CM Special package a\anga mi 50 hnena \anpuina pek ang sawi pawh mi 35 zawk a nih thu leh chhungkaw 60 hnena LSC pek tawh anga sawi pawh a dik tluantling lo nia sawiin, Sakawrtuichhun ramah mi 45 tan inhmun duan a ni a, hei hi vawiin thlenga LSC pek chhuah an la nih loh thu leh Two wheeler taxi, Sumo leh Taxi Permit engemawzat pekchhuah anga sawi pawh Two wheeler taxi Permit 5 bak an member ten la hmuh loh thu an sawi ve thung.
