Police leh YMA \angkawp hian nimin tlai khan Aizawl Edenthar Veng-a Pi Denghliri in-ah hnamdang kum tling lo nia hriat mi 12 te hi an hmu chhuak a, an vai hian police ten la in, vawiin khan court ah hruai an ni.
Central YMA President Pu Vanlalruata hnen atanga ZONET thudawn danin, tunhnaiah Mizoram hi mihring hmanga sumdawnna kalkawngah mi \henkhatin an hmang nia hriat a ni a, Edenthar Veng YMA hruaitute chuan an huamchhungah hnamdang mikhual thleng \euh \hin an awm tih hi hmu chhuakin nimin tlai khan Central YMA lam an hriattir a, Central YMA leh Police te hian Edenthar venga Denghliri in hi pan nghalin, hnam dang kum tling lo nia hriat hmeichhe 8 leh mipa 4 lo awm te chu chhanchhuakin Bawngkawn Police Sation-ah an hruai nghal a ni.
Heng hnamdang kumtling lo te lo kawltu Denghliri chuan a unaunu fanu Madiki, Tahan, Myanmar-a miin motor hmanga hnam dangte an inah an dah tur thu leh lo buaipui tura a hrilh \hin thu sawiin, a in-ah hian zan khat vel an riah hnuah Myanmar lam panin an phur leh \hin nia a hriat thu a sawi a. Tun hi a tum nga na a nih thu a sawi.
Denghliri hian a mikhualte hnen a\ang hian ei leh in manah mi pakhatah Rs.3000 vel te a laksak \hin a, a bak chu an chungchang a hriat thui loh thu a sawi a, Maxi Cab driver hrang hrangin a in-ah hian dahin an lachhuak leh \hin tih a sawi.
Heng hnamdang hmeichhe 8 leh mipa 4 te hian ILP an neih loh bakah tunge an nih finfiahna tur lehkhapawimawh kawl an nei lo a, an mobile phone kawl-ah pawh sim card a awm lo vek bawk a. An vai hian Hindi an thiam mumal lo a, an mahni hruaitute hian Bangladesh refugee camp atangin Karimganj, Assam-a an hruai hnuah Mizoram an panpui leh niin an insawi a ni.
Central YMA president Pu Vanlalruata chuan kumin April 22, khan police hotute nen mihring tawlhrukna kalkawngah Mizoram hman a nih chungchang hi an lo sawi ho tawh tih Zonet a hrilh a, lehkhapawimawh nei mumal lo ten Vairengte leh Zokhawthar police checkgate an paltlang theih dan chu sorkarin a enfiah \ul a tih thu a sawi.
