Tangkhangte hi mi 500 chuang an in report tawh tih MP hian a sawi a, an zingaha hian zirlai bakah zin veivak leh dam lo leh damlo buaipuia zinte pawh an tel a, hnathawk zinga a tam zawk chu mimal company leh hotel, restaurant, spa leh parlour-a thawk an nih thu a sawi bawk a, khawpui hrang hrang 40 vela an awm darh thu te leh a ṭhen chu hlawh la mumal lo te, inluah man pek theih loh vanga an in luah aṭanga chhuahtir te pawh an awm avangin, Mizorama haw an enghelh hle tih a sawi bawk a ni. Pu C.Lalrosanga chuan State pawna tangkhangte hian hnam thila inthliarna emaw an tawh lohna atan leh an thlavang hauh turin State hrang hrang Chief Secretary-te leh sorkar mi pawimawh dangte a dawr tawh tih a sawi bawk a ni.
Mizoram pawn lama tangkhangte hi mi ṭhenkhat tlawmngaiin an buaipui ṭan a, Chandigarh-a awm mek, Mizorama hnathawka awm ṭhin Pu Brig. BS Gill leh Col.John Zama (President,Mizoram Ex- Services League) leh Human Right Law Network ukil, Rosalynn L Hmar-te chuan Mizo tangkhang eng emaw zat an biak pawh hnuah, MP leh Chief Secretary hnenah report an thehlut a ni.
Lockdown vanga state pawn lama awm Mizo zingah harsatna tawk an awm chuan biak pawh theih turin Brig. BS Gill hian, a ṭhianpa Col. John Zama (President, Mizoram Ex-Services League) nen ruahmanna siamin Pu Gill-a phone number hi thehdarh a ni a, hei hi Zonet News Unit chuan be pawpin, Rosalynn L Hmar nen hian a inhmelhriat tir a ni.
Brig BS Gill hi sipai huaisen tangkapui pawh lo dawng tawh, kum 1953 leh 2004 inkar chhung Mizorama lo awm tawh a ni a, a pu leh a fapa te pawh Mizoramah hun rei tak chu hna thawkin an lo awm tawh bawk a, March ni 30 khan CM Relief Fund-ah cheng nuai khat a lo pe tawh nghe nghe a ni.
