Election Department hotute hnen a\anga Zonet thudawn danin, Mizoram Parliamentary Constituency-a vote tlate hi District hrang hranga Counting Hall 40-a dawhkan 380-ah a ruala chiar a ni dawn a. Aizawl District-a Assembly Constituency 14-a vote tlate chu Treasury Square-a Assembly Annex Building, Mualpuia R. Deng\huama Hall leh Mission Venga Govt. Aizawl College-ah te chhiar a ni dawn a. Assembly Annex Building-ah chuan Assembly bial 9-a vote tla chhiar a ni ang a, R. Deng\huama Hall-ah Assembly bial 4 leh Govt. Aizawl College-ah Aizawl West I Bye Election leh Lok Sabha-a vote tlate chhiar a ni ang. Aizawl District-ah hian Aizawl West I assembly bial bye Election leh Lok Sabha-a vote tlate chu Round 4-a chhiar tur a ni a, Chalfilh biala vote tlate chu round 3 chhiar a ni dawn a, hemi tih loh bial dang zawnga vote tlate chu Round 2-ah zawh fel tur a ni.
Mamit-ah chuan Asembly bial 3-a vote tlate chu DC Office Complex-ah chhiar a ni dawn a. Hetah hian Dampa leh Mamit biala vote tlate chu Round 5 chhiar tur a ni a, Hachhek biala vote tlate chu Round 6 chhiar a ni ang a, vote chhiar nan hian dawhkan 26 ruahman a ni.
Kolasib-ah pawh Assembly bial 3-a vote tlate chu Govt. Kolasib College New Multipurpose Hall-ah chhiar a ni dawn a, heng bial 3-a vote tlate hi Round 3-a chhiar zawh vek tur a ni a, vote chhiar nan hian dawhkan 30 ruahman a ni.
Champhai-ah chuan Assembly bial 5-a vote tlate chu DC Office Complex-a DPRC Building-ah chhiar a ni dawn a. Lengteng, Tuichang leh East Tuipui bial vote tlate chu Round 6-a chhiar zawh a ni ang a, Champhai North chu Round 5 leh Champhai South chu Round 7-a chhiar zawh tur a ni a. Champhai District-a vote chhiar nan hian dawhkan 25 siam a ni.
Serchhip-ah chuan Assembly bial 3-a vote tlate chu DC Office Complex-ah chhiar tur a ni a. Serchhip District-a Assembly bial 3- Serchhip, Tuikum leh Hrangturzo biala vote tlate hi Round 4-a chhiar zawh tura ruahman a ni a, heng vote tlate chhiar nan hian dawhkan 21 ruahman a ni.
Lunglei District-a Assembly bial 7-a vote tlate chu Saikuti Hall-ah chhiar a ni dawn a. Hetah hian South Tuipui, Lunglei north, Lunglei East, Lunglei West leh West Tuipui biala vote tlate chu Round 3 \heuh chhiar a ni dawn a, Lunglei South leh Thorang biala vote tlate chu Round 4-ah chhiar a ni thung ang. Lunglei District-a Vote chhiar nan hian dawhkan 60 siam a ni.
Lunglei District-a Assembly bial 3-a vote tlate chu Govt. Lawngtlai College-ah chhiar tur a ni a, hetah hian Tuichawng leh Lawngtlai West bial vote tlate chu Round 7-a chhiar tur a ni a, Lawngtlai East-a vote tla chu Round 6-a chhiar zawh tur niin, heng vote chhiar nan hian dawhkan 26 ruahman a ni.
Siaha District-a Assembly bial 2-a vote tlate chu DC Office Complex-ah chhiar a ni dawn a. hetah hian Siaha District-a bial 2- Siaha leh Palak biala vote tlate chu Round 4 ve ve-a chhiar zawh tur a ni a, heng vote tlate chhiar nan hian dawhkan 22 ruahman a ni.
Lok Sabha leh Aizawl West I bial Bye election-ah hian April ni 11 khan vote thlak a ni a. Lok Sabha bikah hian inthlan chuhtu mi 6 awmin chungte chu BJP Candidate, Pu Nurupam Chakma, MNF Candidate, Pu C. Lalrosanga, Prism candidate, Pu TBC Lalvenchhunga, Congress leh ZPM-in an thlawp Independent Candidate, Pu Lalnghinglova Hmar leh Independent Candidate pahnih – Pu Lalhriatrenga Chhangte leh Pi Lalthlamuani te an ni.
Lok Sabha member tur thlannaah khan Mizoram pumah vote nei mi 7,87,777 zinga 4,97,255 ten vote an thlak a, hei hi za zela 63.12 a ni a, Aizawl West-I Assembly bye election-ah chuan Candidate 3 – MNF Candidate, Pu Zothantluanga, Congress leh ZPM-in an thlawp Independent Candidate, Pu Lalbuanga Sailo leh Independent Candidate, Rev. Dr. Zaichhawna Hlawndo te an awm a, hetah hian vote zaa 70.4 a tla thung a ni. Election Department hotute chuan, Lok Sabha leh Aizawl West I bial Bye election vote tlate chhiar turin ruahmanna hrang hrang peihfel a ni tawh tih an sawi a ni.
