Hemi rual hian National Highway 54 tih loh Mizoram chhunga National Highway dang zawng chu State PWD kuta dah turin a ngen a, Mizoram chhunga National Highway siam \hatna tur sum dil zawng zawng pawh Lok Sabha inthlan puan a nih hma ngeia sanction fel vek turin Pu Gadkari chu a ngen a ni. A ngenna chu chhangin Pu Nitin Gadkari chuan Seling-Champhai kawng siam \hatna tur sumte, New Vervek leh Tuivai inkar kawng siamna turte, Tuivai lei dawh\hatna tur te, Sihhmui leh Lengpui inkara Tlawng lei dawhna turte leh kawng \henkhat thuam \hatna tur sum chu hun reilote hnua sanction theih a nih tur thu Chief Minister chu a lo hrilh a, heng hna te hi hna hmanhmawh a nih avanga sanction chhuah hmaa tender lo chhuah mai Chief Minister-in a ngen chu Pu Gadkari chuan a remtihpui bawk a ni. Pu Zoramthanga chuan Pu Nitin Gadkari chu Lunglei leh Tlabung inkar kawnga Phairuangkai lei dawhna tur sumte leh Durtlang leh Sihphir inkar kawng laih zauhna tur sum mamawh ngaihtuah sak turin a ngen bawk a, Union Minister chuan heng hna chi 2 thawhna tura sum mamawhte chu ruahman sak thuai a ni dawn tih Chief Minister chu a hrilh a ni. An inkawmnaah hian Pu Zoramthanga chuan Mizoram chu ruahtui tamna ram a nih avangin Alkatra hmanga kawng siam a tlo loh thute, Cement Concrete a kawng siam a tlo zawk thute a hrilha a thil sawi chu lo enzui a tum thu Pu Gadkari chuan a hrilh a ni.
Nimina an inkawmnaah hian Pu Zoramthanga chuan Hmarchhak bial State hrang hrang economy siam\hat nan uar zawka mau chin pawimawh a tih thute, Mizoramah chuan Mau chin seng khawm phurh chhuah nan Bamboo Link road siam a pawimawh thute Union Minister chu a hrilh bawk a ni. Pu Gadkari hi Ministry of Road Transport and Highways Director General & Spl.Secy leh Chief Engineer ten an \awiawm a, Pu Zoramthanga hi Delhi-a Resident Commissioner, Pu Umakant, PWD Chief Engineer, Highway Pu K. Lalsawmvela, Private Secretary to Chief Minister Pu Lalhmansanga ten an \awiawm a ni.
