Congress thalai hian, hetiang taka kawng a chhe chung hian mumal taka siamthat tuma hmalakna hmuh tur a awm lo tih an sawi a. Nikum June thla maia Assembly Session-ah khan MNF MLA Pu Zothantluanga chuan House-ah Resolution pulutin, “MNF Ministry-in hun rei lote chhunga Zoram dung leh vanga kawng chhe tak a siamtha mai hi lawmawm kan ti,” tih a chhawpchhuah chu House-a pass a nih atanga a la rei loh tehlul nen Zoram dung leh vanga kawng chhia siamtha titute hian Zoram dung leh vang kawng hi an hmu lo em ni tih chu an zawhna a nih thu an sawi a. Tun dinhmunah Thingdawl-ah mai pawh lirthei a tlan hlei thei tawh lo tih lo hre nawn turin Sorkar chu an chah a ni. MPYCC hian, Chief Minister Pu Zoramthanga, PWD changtu ni bawk hian kumin May ni 21, ni 25 leh vawiin khan Kolasib District kawng hi a tlawh a. Chief Minister hian Kolasib District kawngpui a tlawh tirh atangin vawiin thlengin hmasawnna hmuh tur a awm loh mai bakah nitin a chhe zual zel a ni, an ti a.
PWD Minister hian siamthatna engmah thlen chuang si lova hetianga kawng tlawh tlawh lo hian Kawnpui to Vairengte inkar siamthatna tur sum hi ruahma se an duh thu leh sorkar hian helai kawng siamna tur sum pek a nei em tih leh sum ruahman a awm tih chu an zawhna a nih thu an saw a. Thingdawl leh a chhenvela bungraw phur lirthei lian a tlan hleih theih loh chungchangah hian a chhehvela chengte chuan sorkar inthlahdah vang a nih thu an hrilh tih an sawi.
MPYCC hian, PWD changtu Chief Minister-in Kawnpui leh Kolasib inkar kawng hi tun hnaiah tum thum lai tlawh mah se, hlawkpuina a la awm lo tih an hmuh thu an sawi a, lei khuar nasa zual mi pahnih thumin kutlawngin an hnawh tih loh chu hnathawk leh hnathawhna tur khawl inchhawp a awm lo niin an sawi.
