Hemi puala inkhawm vawiin tlai dar 4-a Raj Bhavna Burball Hall-a neih hi Chief Secretary, Pu Lalnunmawia Chuaungo-in a kaihruai a, Lokayukta Chairman atan Pu C. Lalsawta ruat a nihna Order a chhiar chhuah hnuah Larsap, Prof. Jagdish Mukhi-a’n rinawmna thu a tiam tir a ni. Lokayukta Chairman atan Pu C. Lalsawta ruat a nih thu hi kumin February ni 28 khan Larsap chuan Mizoram Lok Ayukta Act 2014, Section 4(1) tlawh chhanin a chhuah a, Pu C. Lalsawta hian he hna hi a zawm a\anga kum 5 chhung emaw, kum 70 a tlin hma emaw a thawk dawn a ni. Lokayukta hi Chief Minister a\anga a hnuailam Minister dang zawngte hlemhletna laka inhnamhnawih nia hriatte chungchang chhuitu tur leh hremna pe theitu tur a ni. Kum 2014 February ni 6 khan khatih laia Law & Judicial Minister, Pu Lalsawta hova mi pawimawhte \hukhawm chuan Lokayukta Draffting Committee-in Mizorama hman tura Lokayukta Act an duan chu an lo pawm tawh a, sum hman turte pawh Budget-ah dah \hin nimah se, chhan hrang hrang vangin a hlawhtling mai thei lova, MNF kaihhruai sorkar thar chuan Chairman tur ruatin a tihlawhtling ta a ni.
Lokayukta Chairman ni ta Pu C. Lalsawta hi Reiek khuaa loneitu Pu Ngama leh Pi Laithangpuii te fapa a ni a, Shillong-a St. Edmund’s College-a BA a zawh hnuah UPSC hnuaia Civil Services Examah IA&AS-ah a inziak tling phawt a, chumi hnuah Civil Service Exam hi bei chhunzawm lehin kum 1981 khan IAS-ah a inziak tlinga, Bihar Cadre-ah dah a ni a, a hnathawh chhung hian hming\ha tak leh rinawm taka hnathawkin Mizoramah pawh kum 2008 a\anga 2011 thleng khan Principal Secretary, Finance, GAD leh hna pawimawh dangte a lo thawk tawh a, Bihar-a a let leh hnuah pawh Bihar-ah Principal Secretary te, Planning Board Adviser leh Chief Secretary tlukpui Vigilance Commissioner-ah te dah a ni a, kum 2015 September thla khan Superannuation pension-in a chhuak a ni.
