Mizoram Legislative Assembly thlasik thutkhawm November ni 14 atanga tan tur chuan ni 3 chhung a awh dawn. Session Programme kimchang hi Business Advisory Committee, Speaker, Pu Hipheia hova vawiina thukhawm chuan an duang a, chumi ang chuan session tan ni, November ni 14-ah chuan hun hmasa chu MLA hlui thi ta mi pahnih Pu Zakhu Hlychho leh Pu F. Lalzuala te sun nan hman a ni ang a, hemi hnu hian zawhna leh chhanna hun hman zui a ni ang a, chumi hnuah sorkar thil pawimawh te tihzui a ni ang. Session tan tuk ni 15 leh a tuk leh, ni 16 te chu sorkar thil pawimawh tihdan hman a ni ang a, thil pawimawh tih tur lut a zirin heng ni hnih chhunga thil tih tur te chu ruahman a ni ang. Assembly Secretariat atanga ZONET thudawn danin he session-a ngaihtuah tur hian sorkar Bill pahnih a lut tawh a, chungte chu The Mizoram Cooperative Societies Amendment Bill, 2017 leh The Mizoram Urban Areas Rent Control Bill, 2017 te a ni a, he Bill hi kum 1974-a The Mizoram Urban Areas Rent Control Act lo siam tawh thlakna tur Bill thar a ni. Vawiina BAC thutkhawmnaah hian Speaker bakah Deputy Speaker, Pu R. Lalrinawma, Parliamentary Affairs Minister, Pu R. Romawia, MPC Member, Pu Lalthanliana leh Assembly Officer te an tel a ni.
