Chief Electoral Officer, Pu Ashish Kundra hnen a\anga Zonet thu dawn danin Polling Party awm zawng zawng 1,176-te chuan an Polling Station naktuka vote thlakna tur hmun an thleng kim vek tawh a, thil tihfel ngaite pawh tifel tawhin naktuk zing dar 7-a vote thlak \an thei turin an inpeih fel dawn a ni. Polling Station hrang hranga duty tur Polling party nimina chhuak lo te chuan tukin khan an duty na tur Polling Station \heuh an pan a, heng mite hi Aizawl khawpui a\anga chhuak te leh District Hqrs. hrang hrang a\anga chhuak te an ni a, vote thlakna tur EVM vote tla zat chhiarna tur VVPAT leh mamawh dangte an keng a, an zingah hian venhim hna thawktu tur Central Armed Police Force leh Mizoram Police te an tel a ni. Polling Station tinah hian a tlangpuiin Presiding Officer pakhat, Assistant Presiding Officer pakhat leh Polling Officer pahnih \heuh an awm a ni.
Vote thlak theih hun chhung hi naktuk zing dar 7 a\anga tlai dar 4 thleng a ni. Mipuiten tluang taka vote an thlak theih nan Mizoram Larsap chuan Negotiable Instrument Acts, 1881 tlawh chhanin naktuk vote thlak ni tur chu sorkar pisa chawlhniah a puang a, sorkar pisa zawng zawng bakah Mizoram sorkar hnuaia Public Undertaking zawng zawng, zirna in zawng zawng leh Bank zawng zawngte pawh chawlh hian a huam a ni. Aizawl leh khawpui danga awm, anmahni awmna thingtlang khaw lama vote nei mi \hahnem tak vote thlak turin an khuaah an haw a, chung zingah chuan Aizawl a\anga an khaw lama haw te pawh an tel a, tukin khan Aizawl kawtchhuah chhim, hmar, chhak leh thlang lamah vote thlak tura haw leh anmahni phurtu motor tam tak hmun hrang hrang panin an chhuak a ni.
Boruak \ha leh muanawm tak hnuaia Vote thlak a nih theih nan sorkarin venhimna \ha tawk a ruahmana, Central Armed Police Force Company 40 chahchhuaha, a \ulna hmunahte duty tir an nih bakah Mizoram State Police, ralthuam kenglo chi Company 19 leh ralthuam keng chi Company 24 hmun hrang hrangah duty tir an ni. Tun \uma Mizoram Legislative Assembly inthlanna neih turah hian vote nei mi 7,70,395 an awma, an zinga mi 3,75,498 chu mipa an nia, a bak mi 3,94,897-te chu hmeichhia an nia, mipa aia hmeichhe tamna hi 19,399 a tling a ni.
An vote thlakna tura Polling Station siam zawng zawng hi 1164 a ni a, hemi bakah hian Tripura a Bru Relief Camp 6 a Mizoram mi awmte vote thlak nan Kanhmunah Temporary Polling Station 15 siam a ni bawk. Heng zinga polling Station 32-te chu ven uluk ngai zual an ni. Naktuk tlai dar 4-a vote thlak zawh veleh vote thlakna atana hman EVM leh vote tla chhinchhiahna VVPAT te chu kharin Vote chhiarna tur District Hqrs-ah an haw pui nghal anga, a dawngtu tur ten lo dawngin Strong Roomah an dah lut dawn anga, vote chhiar ni atana ruat, December ni 11 thleng sipai ten \ha takin an veng dawn a ni.
