(Pic with Audio : Oath taking)
Larsap thar lakluhna inkhawm Raj Bhavan Durbar Hall-a neih hi Chief Secretary, Pu Lalnunmawia Chuaungo-in a kaihruai a, President Ramnath Kovind-a’n Prof. Jagdish Mukhi-a Mizoram Larsap atana a ruatna lehkha, Warrant of Appointment a chhiar chhuah hnuah Gauhati High Court Justice, Pu Nelson Sailo chuan rinawmna thu tiam tirin a lalut a ni. Puan tawh \hin angin, Mizoram larsap nilai, Pu Kummanam Rajashekharan chuan ningani khan President hnenah banna a thehlut a, a banna hi President chuan a pawm tih nimin khan Rastrapati Bhavan chuan a chhuah a, Mizoram Larsap nghet tur ruat a nih hmaa he hna lo hmui tur hian Assam Larsap, Prof. Jagdish Mukhi chu ruat nghal a ni. Mizoram Larsap bang ta Pu Kummanam Rajasekharan hian nikum May ni 29 khan a hna a zawm a, kum 1 tlin hma-in a bang leh ta a, a banna chhan hi sawichian awm lo mah se, chanchinbu lama tarlan a nih dan chuan kumina Lok Sabha inthlanna neih turah Kerala-a Tiruvananthapuram bial-ah BJP ticket-a din a tum vanga nia sawi a ni.
Vawiina Larsap lakluhna inkhawmah hian Chief Minister, Pu Zoramthanga, Assembly Speaker, Pu Lalrinliana Sailo, Home Minister, Pu Lalchamliana, P&E Minister, Pu R. Lalzirliana, Agriculture Minister, Pu C. Lalrinsanga, Dy. Speaker, Pu Lalrinawma, RD Minister, Pu Lalruatkima, Social Welfare Minister, Dr. K. Beichhua, Sports Minister, Pu Robert Romawia Royte, Lok Sabha member, Pu CL Ruala, BJP Mizoram Pradesh President, Prof. JV Hluna leh Sorkar mi pawimawh hrang hrangte an tel a ni.
