Tunhnaia din thar, Mizoram Legislative Assembly 8-na \hutkhawm vawiina neihah thusawiin Larsap chuan Zohnahthlak India ram chhung leh ram pawna awmte inunauna leh inpumkhatna chu India ram danpui hnuaiah humhima tihhmasawn tum a ni ang a ti a, inthlanna neih zawh taka MLA atana thlantlin MLA thar 20 leh tun hmalama MLA lo ni tawh thlan nawn leh mi 20 te chu thinlung taka a lawmpui thu sawiin inthlanna dik, felfai leh muanawm neih theihna tura hnathawktu, sorkar hnathawk, tlawmngai pawl, Kohhran leh Mizoram People Forum chungah lawmthu a sawi bawk. Larsap chuan a sorkar chu danglamna thlentu, langtlang sorkar, mawhphurhna la ngam leh hlemhletna laka fihlim a ni dawn niin a sawi a, hemi kawnga hmalaknaah hian hlemhletna dotu tur, Vigilance Commission, Lok Ayukta tia hriat bawk chu a nih dan tur angin hnathawh tir thuai a ni ang a, inrelbawlna leh hmasawnna tihchak nan thuneihna insem zai a ni dawn tih a sawi a, remna leh muanna boruak \ha a awm theih nan ramri venhim a ni ang a, ramri hrula chengte hmasawnna ngaihtuah a ni ang a, chumi rual chuan Mizoram Village Level Citizen Registration siama ramria mihring chengte chhinchhiah an ni dawn niin a sawi. Larsap chuan a kaihhruai sorkar chuan huaisen takin Socio Economic Development Policy a kalpui dawn niin a sawi a, he Policy hmang hian hmasawnna tura ruahmanna huam zau tak a siam a, chungte chu mipuite hmasawn nan tih puitlin a ni dawn niin a sawi. Larsap chuan Mizoram chhunga National Highway leh kawng dangte siam\ha tura hmalak a nih dawn thu te, Tuirial Hydel Project kawlphetha megawatt 60 pe chhuak thei tur chu a taka hman theiha siam thuai tum a nih thu te, olympic charter zulzuiin sports policy thar siam tum a nih thu te, mihringte hrisel nan an tlin tawk health care scheme siamsaka, MNF sorkar hmasa-in Mizoram State Health Care Scheme a lo siam tawh ennawna, chhunzawm leh tum a nih thu te, Mizoram hi India rama State fai ber a nih theihna tura \an lak zui zel te, sikul kai hun leh sikul calendar Mizote nunphung leh khawsak dan mila ennawn tum a nih thu te Larsap chuan a sawi bawk.
Naktuk, Ningani-a session chhunzawm a nih hun chuan hun hmasa chu Session hmasa leh tun Session inkara member hlui thi Pu S. Laldingliana leh Prime Minister hlui thi ta, Pu Atal Bihari Vajpayee sun nan hman a ni ang a, chumi hnuah House-a Larsap thusawi chungchanga lawmthu sawina motion sawihova pawm tum a ni ang. Naktuk session-ah hian Deputy Speaker thlan a ni dawna, he inthlanna neih tura hriattirna hi nimin khan Speaker, Pu Lalrinliana Sailo chuan a chhuah a, chuh duhte tan vawiin tlai dar 3 thleng khan hun hawn a ni a, hemi chhung hian rorellai pawl, MNF lam a\angin Tuikum bialtu MLA, Pu Lalrinawma chauhin hming a pek luh avangin a ni hi chuhtu awm lova tlinga puan a nih rin a ni.
