MJA hruaitute hian Chief Secretary, Pu Lalnunmawia Chuaungo hmuin, tun thla ni 11-a Lunglei Bawrhsap kaihhruaia 60 Battalion BSF, 131 Battalion BSF, Sub-Hqrs YMA Lunglei leh Lunglei SP-ten Bangladesh ramri-a duty chungchang joint meeting an neih-a thurel 6-naah “Media miten ramri hrul an tlawh duh a nih chuan a huamchhung BSF Commandant hnen atangin phalna an la hmasa phawt tur a ni ang” tih tarlan chu press mite zalenna rahbeh tumna a ni tih an sawi a. Hetianga anmahni aiawh tel hauh loa media mite zalenna rahbehsakna thu pass a nih hnu hian a tuk May ni 12-a Lunglei District MJA member ten Press Accreditation Card awrh chunga Tlabung Chawnpui Branch YMA duty tlawh an tum chu, BSF duty ten an lo dan avangin an hlawhtling thei ta lo a ni, an ti.
Lunglei DC kaihhruai-a thutkhawmnaah media aiawh tumah tel lova media mite chungchang an lo rel leh, Freedom of the Press rahbehna thu an lo pass ve ngawt hi MJA Gen. Hqrs. chuan mak a tih thu te, democracy rama hetianga a thleng hi pawi an tih thu leh an dem thu te MJA hruaitute hian an sawi a, Democracy-ah chuan thil a langtlang tur a ni a, ramri vengtu BSF te pawhin engtik lai pawhin an hnathawh te media miten an hmuhpui an ngam turah an ngai tih an sawi.
MJA chuan hetiang harsatna hi Lunglei District leh Mizoram hmun dangah a thlen tawh loh nan leh, Lunglei DC hova an thurel chu paih a nih theih nan hmala tur leh Bangladesh ramri khawi lai pawh media miten tlawh an duh huna BSF ten an lo dan buai tawh loh nana hmala turin Chief Secretary hi an ngen a. Chief Secretary hian tihsual palh awm chu siamthat a nih tur thu leh hetiang thil hi a thlen nawn leh tawh loh nan bawhzui a nih tur thu MJA hruaitute hi a lo hrilh a ni.
