Agriculture Director, Pu Rohmingthanga Colney chuan, he pangang hian Mizoram pum a d^p tawh tih Zonet a hrilh a, hriat theih chinah khaw 80-ah pangang hnuhma hi hmuh tawh niin, ram Hectare 1,409-a Vaimim a eichhe tawh a ni. Pangang hian Aizawl District-a khaw 31 a luhchilh tawh a, Kolasib District-ah khaw 5, Mamitah khaw 10, Serchhipah khaw 10, Lawngtlaiah khaw 4, Lungleiah khaw 10, Siahaah khaw 4 leh Champhai District-a khaw 6-ah pangang hian bu a khuar mek tih a sawi.
ZONET zawhna chhangin Pu Rohmingthanga Colney chuan, tun din hmunah he rannung thahna hlo hi ngah lutuk lo mah se, a mamawhtute hnena semchhuah tur tlem a zawng chu an la neih thu a sawi a, hetihrual hian neih sa an ngah tawh loh avangin a lei belhna tur Sorkarah dil belh tum a ni a, hlo tur supply tute pawh dah khawlsa nei reng turin an hriattir tawh bawk tih sawiin, he pangang vanga harsatna thleng mek chungchang hi Sorkar laipui pawh hriattir a ni dawn tih a sawi. Agriculture Director chuan, Fall Armyworm puang vanga harsatna chu sutkian a nih theih nan Department chuan theihtawp a chhuah a ni, a ti a. Thawktute pawh thlai hmunah kalin thil awmdan enfiah tir zel an ni a, he pangangin a tihbuai loneitute pawh a thahna hlo a thlawna pe an nih bakah a hman dan zirtir an ni a, hemi kawngah hian chak zawka hmalak a nih theih nan naktuk, inrinni hi Sorkar pisa chawlh ni mah se, Directorate leh District Office te chu pisa kai vek tura hriattir an nih thu a sawi.
Pangang puang vanga harsatna tawh mek sutkian dan tur hi vawiin khan Agriculture Department hotuten an Secretary, Pu Lalhmingthanga hovin an ngaihtuah a, hetah hian chak zawka hmalak a nih theih nan Rapid Respond Team an din a, he team hi an Department Joint Director Pu Lalsiamliana’n a ho dawn a ni.
